На Магілёўшчыне сёння адчыняць больш за 30 пунктаў абагрэву
На працягу сённяшняга дня ў Магілёўскай вобласці адчыніцца больш за 30 пунктаў абагрэву ў сувязі з рэзкім пахаладаннем. Пра гэта агенцтву БЕЛТА распавёў старшыня Магілёўскай абласной арганізацыі Беларускага таварыства Чырвонага Крыжа Андрэй Нікіцін.
25 стацыянарных пунктаў абагрэву адкрыюцца ў сельскіх раёнах, чатыры — у Магілёве, два — у Бабруйску. У Магілёве і Бабруйску, акрамя таго, па два перасоўныя пункты абагрэву будуць ездзіць па горадзе і спыняцца ў месцах масавага знаходжання людзей — у тым ліку на чыгуначных і аўтавакзалах, канчатковых прыпынках грамадскага транспарту. Яшчэ адзін часовы пункт абагрэву з 10.00 пачаў працаваць на Мінскім рынку ў Магілёве: там паставілі намёт з генератарам.
У гэтых пунктах можна будзе абагрэцца, папіць гарачай гарбаты з печывам, для ахвочых зладзяць гарачае харчаванне хуткага прыгатавання.
У гарадскім цэнтры часовага (начнога) знаходжання (вул. Навіцкага, 3) бяздомным увечары 7 лютага будуць бясплатна раздаваць тэрмабялізну, коўдры, цёплую вопратку, абутак і сродкі гігіены. Тут таксама пры неабходнасці можна будзе атрымаць гарбату і гарачае харчаванне.
Пункты абагрэву будуць працаваць у Магілёўскай вобласці, пакуль будуць працягвацца моцныя халады. Сёння тэмпература рэзка панізіцца — да вечара чакаецца -19..-20 градусаў, а ўначы пры праясненнях прагназуюць да 28 градусаў марозу. Пацяпленне ў рагіёне пачнецца з 10 лютага.
