Наталля Хершэ не пісала прашэнне аб памілаванні на імя Лукашэнкі
Беларуская палітзняволеная Наталля Хершэ не пісала прашэнне аб памілаванні на імя Аляксандра Лукашэнкі. Пра гэта Еўрарадыё распавёў яе брат Генадзь Касьян.
Вызваленне, відаць, стала магчымым, дзякуючы прыезду ў Беларусь новага швейцарскага пасла і ўручэння міністру замежных спраў Уладзіміру Макею копій даверчых грамат.
Грамадзянка Швейцарыі беларускага паходжання Хершэ выйшла на волю 18 лютага. За кратамі яна правяла 17 месяцаў, а цяпер вяртаецца ў Швейцарыю праз Турцыю. У снежні 2020 года яна была асуджана ў Мінску на 2,5 года калоніі строгага рэжыму за супраціў міліцыянеру падчас вулічнай акцыі — на адным з жаночых маршаў яна сарвала балаклаву з амапаўца.
"Яна не згубіла сілы духу", — кажа брат. Наталлі не дазволілі забраць з сабой запісы, якія яна рабіла ў зняволенні.
