"Не дурыце галавы". На што трацяцца грошы, якія КДБ выбіваў з беларусаў

14/10/2024 - 16:17

Куды ідуць грошы, выбітыя з беларусаў? / pixabay.com

Летась КДБ выбраў новую тактыку пакаранняў за данаты — перавод грошай на рахунак сацыяльнай установы або арганізацыі аховы здароўя.

На што ідуць гэтыя немалыя сумы і якім чынам іх трацяць? Еўрарадыё патэлефанавала ў некаторыя з іх з мэтай даведацца падрабязнасці.

"Грошы трацілі на рамонт школы"

Пад выглядам чалавека, які перавёў на рахунак дзяржарганізацыі немалую суму, перш-наперш журналіст Еўрарадыё патэлефанаваў у "Мсціслаўскую спецыяльную школу-інтэрнат".

Паводле інфармацыі "Зеркало", толькі ў 2024-м ДУА "Мсціслаўская спецыяльная школа-інтэрнат" атрымала больш за 120 000 долараў "дабрачынных ахвяраванняў". У бухгалтэрыі нам расказалі, што ўсе грошы пайшлі на рамонт. Няўжо ўсе 120 тысяч?

Па інтанацыі і пытаннях, якія задавала супрацоўніца, склалася ўражанне, што яна наогул не ў курсе якіх-небудзь добраахвотных ахвяраванняў.

— Ну мы наогул грошы трацілі на рамонт школы. Дагавор мы ж з вамі не заключалі, правільна? Вы так проста ад фізасобы паклалі, ці правільна я разумею? Так, мы рабілі рамонт школы.

— А як гэта можна праверыць?

— Звычайна, калі мы складаем дамовы, то мы даем справаздачу аб выкарыстанні сродкаў.

— А прыехаць і паглядзець я магу?

— Калі ласка, як сабе хочаце, я думаю, кіраўнік не супраць будзе. Ну, вось летам мы зрабілі рамонт у спальных пакоях для дзяцей, у кабінеце лагапеда. Працы нам рабілі падрадныя арганізацыі. А вы менавіта фізасоба, так? Ну, калі нейкія пытанні ў вас ёсць, то лепей, вядома ж, пад'язджайце.

“А чаму я павінна паверыць, што вы нам нешта пералічвалі?”

Яшчэ адна арганізацыя, куды КДБ прымушаў беларусаў пераводзіць грошы, — РНПЦ траўматалогіі і артапедыі. Тут не адмаўлялі, што грошы паступалі на іх рахунак, але настойліва прасілі назваць імя і прозвішча для "праверкі інфармацыі".

— А чаму я павінна паверыць, што вы нам нешта пералічвалі? Вы назавіце хоць якія свае рэквізіты, каб я паглядзела. Як я магу быць упэўненая, што гэта былі вы?

— А навошта камусьці, акрамя мяне, тады вам тэлефанаваць?

— Ну дык калі вы пералічвалі, значыць ваша прозвішча я магу паглядзець. Ці мала, хто можа тэлефанаваць. Не хочаце размаўляць па тэлефоне — прыходзьце да нас з дакументамі.

— І тады вы нам раскажаце, што купілі за мае грошы?

— Так. Я проста хачу ведаць, хто ў мяне гэта пытаецца і быць упэўненай, што пытаецца той, хто гэта рабіў [пералічваў грошы]. Прыйдзіце з пашпартам, я пагляджу. Я вам усё сказала, па тэлефоне і на словах нічога гаварыць не буду.

“Ну што ну, я галоўны бухгалтар! Не было плацяжоў”

Акей, не хочаце гаварыць — і не трэба. Тэлефануем далей, на чарзе — РНПЦ медыцынскай экспертызы і рэабілітацыі. Пра тое, што КДБ прымушае пералічваць ім грошы, "Зеркало" паведамляла яшчэ ў траўні 2023 года. Але аказваецца, тут наогул нібы і не чулі пра якіясьці данаты.

— За што вы нам пералічвалі? Не ведаю, ніхто нам нічога не пералічваў. Не было нічога. Няма ў нас дабрачыннай ніякай дапамогі. Не ведаю, не было ніякага паступлення ў нас.

— Як гэта вы не ведаеце?

— Ну што ну, я галоўны бухгалтар! Не было плацяжоў. Пакажыце тады квітанцыю. У нас такой дапамогі не было. Слухайце, не дурыце галавы, я марную на вас час. Я вам сказала ясна.

"Проста грошай паступае шмат"

Далей мы звязаліся з РНПЦ дзіцячай анкалогіі, гематалогіі і імуналогіі. Тут не адмаўлялі фактаў "дабрачыннай дапамогі", але для праверкі інфармацыі таксама папрасілі даць персанальныя звесткі.