Пад санкцыі ЕС трапілі "Белнафтахім", БМЗ, завод імя Казлова
"Новыя санкцыі ЕС супраць Беларусі — сігнал Лукашэнку, што беспакаранасці не будзе" / Ілюстрацыйнае фота pixabay.com
Пад новыя санкцыі Еўрасаюза супраць рэжыму Аляксандра Лукашэнкі трапілі тры юрыдычныя асобы — "Белнафтахім", БМЗ, Мінскі электратэхнічны завод імя Казлова. У афіцыйным часопісе ЕС таксама паведамляецца, што ў "чорны спіс" дадалі 38 фізічных асоб. Гэта прапагандысты (Вадзім Гігін, Яўген Пуставы, Ксенія Лебедзева) і сілавікі (начальнікі папраўчых калоній, у якіх утрымліваюць палітвязняў, суддзі, пракуроры, міліцыянеры, следчы).
Раней стала вядома, што Еўрасаюз пашырыў санкцыі супраць афіцыйнага Мінска. Новыя меры скіраваныя на барацьбу з абыходам антырасійскіх абмежаванняў.
"Новыя санкцыі ЕС супраць Беларусі — сігнал Лукашэнку, што беспакаранасці не будзе", — кажа дарадца Святланы Ціханоўскай Франак Вячорка ў каментары "Позірку". Паводле яго слоў, больш за год санкцыі супраць рэжыму блакаваліся, што "ў вялікай ступені развязала рукі Лукашэнку, прывяло да эскалацыі рэпрэсій, арыштаў і яшчэ большага ўцягвання Беларусі ў вайну і расійскую арбіту".
