Палітзняволенага філасофа Уладзіміра Мацкевіча этапавалі ў шклоўскую калонію
Уладзімір Мацкевіч / З архіву Еўрарадыё
Палітзняволенага філасофа Уладзіміра Мацкевіча этапавалі ў шклоўскую калонію з магілёўскай турмы, піша @methodology_by. За кратамі ён са жніўня 2021-га. У чэрвені 2022-га Мацкевіч быў асуджаны на пяць гадоў зняволення ў калоніі ўзмоцненага рэжыму. Яго прызналі вінаватым па трох артыкулах Крымінальнага кодэкса: у "абразе Лукашэнкі" (за відэазапіс на YouTube-канале), "арганізацыі і падрыхтоўцы дзеянняў, якія груба парушаюць грамадскі парадак" (удзел у вулічнай акцыі пратэсту 25 кастрычніка 2020 года) і "стварэнні і кіраўніцтве экстрэмісцкім фармаваннем" (так называюць платформу народных прадстаўнікоў "Сход").
У магілёўскую турму Уладзіміра Мацкевіча перавялі ў ліпені. У зняволенні ён піша кнігі, нягледзячы на пагрозу канфіскацыі тэкстаў.
Новы адрас палітвязня: ПК № 17, 213004, г. Шклоў, вул. 1-я Заводская, 8, Уладзімір Уладзіміравіч Мацкевіч.
