Першая інфлюэнсерка — што вы маглі не ведаць пра Ефрасінню Полацкую

Ефрасіння Полацкая — першая, хто згадваецца, калі мы гаворым пра вядомых жанчын-беларусак. На жаль, гісторыю пра яе ў падручніках часта падаюць так, што хочацца хіба заснуць, і часцей за ўсё ў памяці застаюцца толькі зніклы крыж і тое, што яна святая заступніца Беларусі.

Коратка ўспамінаем цікавыя факты пра Ефрасінню — першую беларускую інфлюэнсерку.

Адмовілася ад жыцця княгіні

Нарадзіўшыся ў княжацкай сям'і, Ефрасіння (тады яшчэ Прадслава) адмовілася ад дынастычнага шлюбу, свецкага жыцця і раскошы. І таемна прыняла манаскі пострыг. Каб дапамагаць людзям і служыць Богу. Фактычна тады, у дванаццатым стагоддзі, гэта была форма эмансіпацыі.

Асветніца

Гэта цяпер у нас ёсць Coursera, а ў тыя часы ў Полацкім княстве была Ефрасіння, якая ўзялася за перапісванне кніг. Гэта была цяжкая фізічная праца і звычайна гэтым займаліся толькі мужчыны, але Ефрасінню не спынілі складанасці — яна хацела спрыяць распаўсюджванню пісьмовага слова, і паспяхова гэта рабіла.

Будавала манастыры

Асабістыя сродкі Ефрасіння аддавала бедным. І вылучала на будаўніцтва цэркваў у Полацку.

Яна заснавала два манастыры, мужчынскі і жаночы. Пры ёй горад стаў адным з цэнтраў асветы на тэрыторыі Беларусі, Ефрасіння наогул зрабіла вельмі многае для развіцця культуры на нашых землях.

Эстэтка

Нарэшце, нельга забыць пра знакаміты крыж Ефрасінні Полацкай. Яна замовіла яго ў ювеліра Лазара Богшы, зроблены крыж быў з золата і срэбра, з выкарыстаннем брыльянтаў.

Рэліквія была страчана падчас Другой сусветнай вайны. Хутчэй за ўсё яе вывезлі на тэрыторыю Расіі. Дагэтуль знайсці яе, адну з галоўных каштоўнасцяў краіны, якая належала святой заступніцы Беларусі, не ўдалося.