Побач з Лукашэнкам ці замужам: чым займаюцца "Міс Беларусь" апошніх гадоў

Нядаўна ў Мінску выбралі "Міс Беларусь — 2023". Ёю стала менеджарка мадэльнага агенцтва ў Нацыянальнай школе прыгажосці Элеанора Качалоўская. Сёлета конкурс запомніўся танцамі з кувалдамі і тым, што новая "Міс Беларусь" не змагла назваць аўтара п'есы "Паўлінка". У астатнім усё прайшло даволі ціха. Затое некаторыя папярэдніцы Элеаноры не саромеюцца афішаваць сумнеўную бурную дзейнасць.

Еўрарадыё даведалася, як жывуць іншыя "Міс Беларусь" апошніх гадоў.

2021. Дар'я Ганчарэвіч

У інстаграме Дар'і напісана:

— Выкладаю дэфіле ў Нацыянальнай школе прыгажосці.

Улетку Ганчарэвіч знялася ў кліпе ў Руслана Аляхно разам з Дар'яй Шманай. У чэрвені 2022 года Аляхно выступіў у акупаваным Херсоне на канцэрце да "Дня Расіі". А Шманай з восені 2022 года з'яўляецца дарадцам-пасланнікам пасольства Беларусі ў Расіі. Да гэтага яна была памочніцай Аляксандра Лукашэнкі.

— Гэта будзе бомба, — кажа пра кліп Ганчарэвіч.

Яшчэ Дар'я шмат падарожнічае. Напрыклад, у Турцыю і Піцер. Сярод іншых актыўнасцяў дзяўчыны — удзел у праўладных мерапрыемствах.

Яшчэ ў дзяржСМІ яна расказвае пра дабрачынны праект "ZooСердце", які павінен дапамагаць бяздомным жывёлам. Ініцыявалі праект Нацыянальная школа прыгажосці і Дар'я Ганчарэвіч.

2018. Марыя Васілевіч

Марыя Васілевіч у 2019 годзе стала дэпутаткай Палаты прадстаўнікоў. Пакуль яна на гэтай пасадзе. The Times пісала, што Васілевіч "выйграла" месца ў парламенце праз рамантычную сувязь з Лукашэнкам. Аднак дзяўчына назвала гэта хлуснёй і раскрытыкавала стандарты The Times. На той момант Васілевіч была "рэдактарам аддзела рэдактараў" на "Беларусь 1".

Пасля перамогі ў конкурсе яна паспела скончыць Маскоўскі інстытут псіхааналізу ў 2022 годзе. У яе ўжо была вышэйшая адукацыя, якую яна атрымала ў БДЭУ.

Як дэпутат Марыя Васілевіч вызначылася. Пасля пратэстаў 2020 года яна наведала ў бальніцы пратэстоўцаў, якія пацярпелі ад рук сілавікоў.

— Я як прадстаўнік дзяржаўнай улады — хоць, можа, і не маю на тое паўнамоцтваў — прыносіла прабачэнні людзям за нанесеныя ім траўмы.

Васілевіч уваходзіць у камісію па правах чалавека Палаты прадстаўнікоў. Аднак яе актыўнасці шырэйшыя — яна прасоўваецца закон пра адказнае абыходжанне з жывёламі. Праца над ім вядзецца з сакавіка 2022 года. Пакуль законапраект не прыняты.

Паліна Барадачова жыве ў Францыі. Яна замужам за хакеістам Яўгенам Нагачовым. У іх ёсць маленькае дзіця. Пра дзейнасць Паліны практычна нічога не вядома. У сацсетках яна піша пра сябе як пра "мадэль" і публікуе пасты, у якіх расказвае пра сям'ю, чытанне, хатнія справы.

У красавіку 2022 года яна напісала ў Instagram:

— Дзень пачынаю з медытацыі. Думаю пра добрае. Цяпер так. Навін не чытаю. Начыталася. Толькі зрэдку з надзеяй пытаю ў мамы па тэлефоне: "Ну што там, вайна скончылася?" Жывеш далей, занураешся ў сям'ю, у самае дарагое. Дыхаеш і дзякуеш. Застаешся моцным і верыш у лепшае. Верыш у чалавечае ў чалавеку. Хочаш верыць.

Вікторыя Мігановіч, відаць, адышла ад свету моды. У сваім Instagram яна прапануе купіць яе курс. "Міс Беларусь — 2014" — касметык-эстэтыст з медыцынскай адукацыяй.

Яшчэ яна падарожнічае, захапляецца жывапісам і нават паказвае свае працы на выставах.

— Сябры, вы нават не ўяўляеце, як прыемна выстаўляць сваю працу побач з вялікімі мастакамі, ды яшчэ і ў галерэі Міхаіла Савіцкага. Дзякуй усім, хто падтрымаў і верыў у мяне, дзякую, — напісала Мігановіч вясной 2021 года.

Вікторыя выхоўвае дваіх дзяцей.