"Пра такое не чула". Як мы шукалі новы падручнік па гісторыі Беларусі і Расіі

23/02/2024 - 16:33

Ці існуе новы падручнік? / @rubanau_collage

Агульны падручнік гісторыі Беларусі і Расіі зусім нядаўна быў анансаваны, але калі верыць рэктару Магілёўскага ўніверсітэта Дзянісу Дуку, ужо выкарыстоўваецца ў беларускіх школах. Хуткасць падрыхтоўкі і выпуску дапаможніка ўражваюць, але ці існуе ён дзесьці, акрамя як на паперы?

Еўрарадыё вырашыла даведацца, што гэта за падручнік і дзе яго можна купіць. Мы зрабілі некалькі званкоў у профільныя інстанцыі. Вось, што мы высветлілі.

У Мінадукацыі пра падручнік... не ведаюць

У Міністэрстве адукацыі журналісту Еўрарадыё, які патэлефанаваў пад выглядам школьнага настаўніка, паведамілі, што пра такі падручнік не чулі.

— Я не ведаю пра такую кнігу і ніколі не чула. У нас ёсць праграмы факультатыўных заняткаў, якія былі зацверджаныя і размешчаюцца на нацыянальным адукацыйным партале, паводле іх і трэба працаваць. А пра такі падручнік я не ведаю, — расказала супрацоўніца і параіла звярнуцца ў метадычны цэнтр Акадэміі адукацыі (так цяпер называецца Нацыянальны інстытут адукацыі і Акадэмія паслядыпломнай адукацыі).

У чарговай інстанцыі нам таксама паведамілі, што нічога пра такі падручнік не ведаюць.

— Я такога не ведаю, далібог. Зараз з новага распрацоўваецца толькі падручнік для 10 класа, і тое, ён з'явіцца ў школах толькі з 1 верасня. Падручніка, пра які гаворыцца ў навінах, у нас няма. Я не ведаю, пра якое выданне ідзе гаворка. У Беларусі можна вучыць дзяцей толькі па тых падручніках, дзе стаіць грыф міністэрства адукацыі. Дык вось, падручніка па гісторыі Беларусі і Расіі ў дадзены момант няма.

Супрацоўніца метадычнага цэнтра дапусціла, што рэктар Магілёўскага ўніверсітэта меў на ўвазе дапаможнік для педагогаў.

— Магчыма, яны з расійскімі калегамі выдалі нейкі дапаможнік з рэкамендацыямі для педагогаў. Бо, ведаеце, людзі між сабой могуць называць рознага роду навучальныя выданні — "падручнікамі". Хоць, па сутнасці, гэта няправільна. Магчыма, пра гэта нешта ведаюць у Акадэміі кіравання, паколькі яны могуць быць выдаўцамі гэтага дапаможніка.

Тэлефануем туды, супрацоўніца не зразумела, пра што ідзе гаворка, і выказала здагадку, што дапаможнік называецца "Асноўныя падзеі айчыннай гісторыі". Аднак патлумачыла, што гэта метадычны дапаможнік, а не падручнік.

"Калі пра гэта казаў наш рэктар — значыць так і ёсць"

Калі пра такі падручнік нідзе не чулі, то што меў на ўвазе Дзяніс Дук? Тэлефануем у Магілёўскі дзяржуніверсітэт.

І са здзіўленнем даведваемся, што дэкан гісторыка-філалагічнага факультэта Віктар Буракоў таксама не валодае ніякай інфармацыяй аб новым падручніку.

— Я не магу адказаць на ваша пытанне. Зразумела, калі пра гэта казаў наш рэктар — значыць так і ёсць, — сумеўся дэкан, — але я пра гэта не ведаю.

Так, гэты падручнік быў у распрацоўцы — я зараз удакладніў пытанне на кафедры гісторыі Беларусі, і там таксама ніхто нічога не ведае. Мы ведаем яго працоўную назву і прыкладных аўтараў, але выходных дадзеных, каб узяць адкрыць і пачытаць, у мяне няма, — растлумачыў Буракоў.