Праваабаронцы назвалі палітвязнямі яшчэ сем беларусаў
Палітвязні, ілюстрацыйнае фота / dpa
Яшчэ сем чалавек атрымалі статус палітвязняў, паведамляюць праваабаронцы "Вясны". Гэта Ігар Жывалун, Наталля Левая, Юрый Лагадзюк, Таццяна Францкевіч, Наталля Лабацэвіч, Алеся Дзернакоўская, Аляксандр Сырыца.
Ігар Жывалун асуджаны па абвінавачванні ў садзейнічанне экстрэмісцкай дзейнасці. Наталлю Левую, як расказвала Еўрарадыё, асудзілі за данаты пратэсным ініцыятывам і беларускаму падраздзяленню, якое ваюе на баку Украіны. Пры гэтым вядома, што жанчына заплаціла грошы, якія патрабавала ад яе КДБ і мела адпаведную даведку ад ведамства.
Юрый Лагадзюк, Таццяна Францкевіч і Наталля Лабацэвіч узятыя пад варту па абвінавачванні ў садзейнічанні экстрэмісцкай дзейнасці. Алесю Дзернакоўскую ўзялі пад варту за фінансавую дапамогу палітвязням. ААляксандра Сырыцу вінавацяць у дзейнасці ў экстрэмісцкім фармаванні ды абразе Лукашэнкі.
На сёння праваабаронцы налічваюць у Беларусі 1387 палітвязняў. Колькасць людзей, якія апынуліся за кратамі па палітчыных прычынах, яшчэ большая.
