Растуць адмовы ў дазволах транс-пераходу ў Беларусі. Маніторынг актывістаў
Колькасць адмоваў у транс-пераходзе вырасла да 80% / sml.snl.no
У Беларусі працэдура транс-пераходу легальная і рэгламентаваная асобным становішчам Міністэрства аховы здароўя.
Фармальна для гэтага ў Беларусі ёсць усе ўмовы, але за апошнія два гады колькасць адмоваў у транс-пераходзе прыкметна вырасла і складае каля 80%.
Ініцыятыва TG House правяла маніторынг працы камісіі па транс-пераходзе ў Беларусі з 2019 па 2024 год і зрабіла несуцяшальныя высновы.
Еўрарадыё коратка пераказвае сутнасць.
Як ладзіцца праца камісіі?
Яшчэ да звароту ў камісію прадугледжваюцца працэдуры нагляду ў сексолага і псіхолага, якія адбываюцца на працягу аднаго года.
Паводле інфармацыі TG House, сама працэдура складаецца з двух этапаў: першы — гэта дазвол на юрыдычны пераход (змена імені і гендарнага маркера), а другі — гэта медыцынскі пераход, які дазваляе гармонатэрапію і хірургічную карэкцыю полу.
Рашэнні камісіі грунтуюцца на медыцынскіх паказаннях і адсутнасці супрацьпаказанняў, такіх як цяжкія псіхічныя разлады або саматычныя захворванні, якія перашкаджаюць медыцынскай карэкцыі.
У склад камісіі ўваходзяць спецыялісты са сфер аховы здароўя, адукацыі і праваахоўных органаў.
Як часта камісія выносіла станоўчыя рашэнні?
Мяркуючы па праведзеным маніторынгу актывістаў TG House, у перыяд з 2019 па 2022 год колькасць станоўчых рашэнняў амаль заўсёды дасягала парадку 80%.
