"Кашалькі Лукашэнкі" браты Карычы вывелі з Беларусі больш за 170 млн еўра

11/10/2022 - 14:15

Драгамір Карыч на сустрэчы з Лукашэнкам / president.gov.by

Драгамір Карыч на сустрэчы з Лукашэнкам / president.gov.by

Незадоўга да ўвядзення заходніх санкцый сербскія бізнесмены браты Карычы прадалі свой беларускі бізнес у Аб'яднаныя Арабскія Эміраты. Як высветліў Беларускі расследавальніцкі цэнтр, уладальнікі кампаній — менеджары іншых фірмаў Карычаў. Дзякуючы гэтай "здзелцы" бізнесмены маглі адмыць 700 мільёнаў еўра.

З 2008 да 2020 года, яшчэ да санкцый і праблем праз супрацоўніцтва з сям'ёй Лукашэнкі, беларускія бізнес-структуры, якія звязаны з Карычамі, вывелі на Кіпр больш за 170 мільёнаў еўра дывідэндаў.

Грошы выводзілі на рахункі некалькіх кампаній, усе яны — выгадаатрымальнікі будаўнічых праектаў Карычаў у Мінску. Ужо тады бізнесмены выбудавалі цэлую бізнес-імперыю, задзейнічаўшы ў тым ліку групу афшорных кампаній.

У снежні 2020-га асноўныя беларускія актывы бізнесменаў — Dana Holdings і "Дана Астра" — трапілі пад еўрапейскія і брытанскія санкцыі, а ў жніўні 2021-га — і пад амерыканскія.

Бізнесмены паспрабавалі (даволі паспяхова) ухіліцца ад негатыўнага ўплыву санкцый. Так, яны памянялі канчатковага ўладальніка кіпрскай Dana Holdings — ім стаў блізкі сябар сям'і Нагіп Бехлулі. Але самае цікавае іншае: літаральна за два тыдні да ўвядзення санкцый Dana Holdings прадала пералічаныя кіпрыёцкія фірмы эмірацкай кампаніі Enterprise Developments Holding. Якой, "па супадзенні", таксама валодае не чужы Карычам чалавек — Мустафа Аль Тобгі.

Dana Holdings прадала пяць кіпрскіх кампаній за 700 мільёнаў еўра. Гэта прыкладна адпавядае ацэнцы журналістаў іх актываў у Беларусі. Але па бухгалтэрыі яны прапісалі кошт гэтых кампаній у 30 тысяч разоў (!) таннейшы — у 21 тысячу 550 еўра, гаворыцца ў справаздачы кампаніі.

У выніку гэтай здзелкі Dana Holdings фармальна атрымала амаль 700 мільёнаў прыбытку. Іншая рэч, што грошы ад продажу на рахунак фірмы на канец 2020 года так і не паступілі, а пазначаны як дэбіторская запазычанасць. Затое ў выніку гэтай маніпуляцыі ўладальнікі Dana Holdings атрымалі магчымасць зняць з рахункаў вельмі буйную суму.

Акрамя таго, журналісты высветлілі, што санкцыі не перашкаджаюць сямейнікам Карычаў кіраваць нерухомасцю ў тым ліку ў цэнтры Лондана.