За пікет у падтрымку Дашкевіча — чарговы завочны прысуд

Прысуд быў вынесены яшчэ 25 жніўня, але пра гэта стала вядома толькі 13 верасня. Суддзя пастанавіла залічыць Шурхаю суткі, праведзеныя ў ізалятары ў Горках. Пра гэта ў жывым эфіры паведаміў Зміцер Шурхай:

“Толькі ўчора ў паштовай скрыні я знайшоў паперку, якая прыйшла з Горак. Пастанова суда, з якой я даведаўся, што 25 жніўня быў завочна асуджаны на 10 сутак арышту. Сядзець я нікуды не пайду. Будзем зараз, на працягу 5 тыдняў ёсць магчымасць пісаць абскарджванне на пастанову суда, бо я з ёй не згодны”.

Нагадаем, што 2 жніўня каля горацкай калоніі міліцыянты затрымалі паўтара дзясятка актывістаў. Пікетоўцы патрабавалі пусціць адваката да палітвязня Змітра Дашкевіча. 10 затрыманых адразу атрымалі “суткі”, двое — штраф. Івану Шылу і Змітру Шурхаю далі адтэрміноўку ў судзе на пошукі адваката. Але на разгляд яны не паехалі. Днямі Шыла атрымаў 20 сутак арышту. Калі ён іх будзе адбываць, невядома, бо хлопец навучаецца ў Польшчы.

Зміцер Шурхай з’яўляецца студэнтам Еўрапейскага гуманітарнага ўніверсітэта, які месціцца ў Вільні.