Школьнікаў Мінска апрануць у аднолькавую форму з дзяржсімволікай
Беларускія школьнікі / 1prof.by
Мінгарвыканкам збіраецца апрануць усіх школьнікаў Мінска ў аднолькавую форму да восені 2024 года.
— Пасля адной з нарад у кіраўніцтва горада прынята рашэнне запусціць для Мінска пілотны праект: да 2024/2025 навучальнага года стварыць рабочую групу... І ўсім разам вызначыць пяць, дзесяць мадэляў адзінай школьнай формы, пасля запусціць іх у гандлёвую сетку, — кажа першы намеснік старшыні Камітэта па адукацыі Мінгарвыканкама Людміла Барысенка.
Яна сцвярджае, што не ўсіх бацькоў "радуе разнастайнасць мадэляў", таму трэба вярнуць адзіную школьную форму, якую можна будзе "свабодна набыць".
— Вядома, ужо з ранніх гадоў мы павінны разумець сваю прыналежнасць да гэтай дзяржавы. І элементы дзяржаўнай сімволікі [на форме], напэўна, павінны быць, — дадае Барысенка.
Чыноўніца адзначае, што ў працоўную групу па распрацоўцы новай формы ўвойдуць педагогі, дзеці, бацькі і прадстаўнікі "Беллегпрама". "Беллегпрам", мусіць, і разлічвае адшываць форму для ўсіх школьнікаў Мінска.
