Што будзе, калі ЕГУ прызнаюць "экстрэмісцкай арганізацыяй"? Адказвае юрыст

09/01/2024 - 08:27

ЕГУ / ehu.lt

Прапагандыст Ігар Тур анансаваў прызнанне ЕГУ экстрэмісцкай арганізацыяй. Юрыст НАУ Арцём Праскаловіч даў парады студэнтам і былым студэнтам ЕГУ.

— Наўрад ці ў рэжыма будзе доступ да адкрытай інфармацыі аб усіх выпускніках, якія маюць дыплом ЕГУ. А вось уладальнікі гэтых дыпломаў, працаўладкаваныя ўнутры Беларусі, могуць сутыкнуцца з праблемамі. У працадаўцаў ёсць дадзеныя аб адукацыі сваіх супрацоўнікаў, і ў іх могуць запатрабаваць прадставіць гэтыя дадзеныя цэнтралізавана органам унутраных спраў.

З такімі людзьмі, имаверна, будуць працаваць: цягаць на "размовы", выпісваць "адміністратыўкі", а камусьці — "крыміналкі". Але не за непасрэдную наяўнасць гэтага дыплома, а праз тое, што падчас размоў, ператрусаў, допытаў, аналізу тэлефонаў і камп’ютараў будуць знаходзіць нейкую дадатковую інфармацыю. Наяўнасць дыплома ЕГУ будзе проста падставай, каб "адпрацаваць" чалавека, папоўніць базу дадзеных "нядобранадзейных".

Улічвайце, што па запыце праваахоўных органаў інфармацыю могуць перадаць куды заўгодна. І наўрад нават у прыватных арганізацыях хтосьці адважыцца ўстаць "у позу" і адмовіцца. Памятаеце, як калісьці ў краіне ўсім "адкаталі пальчыкі"? Таксама, калі захочуць, збяруць усю інфармацыю аб дыпломах ЕГУ, на падставе якіх чалавек калісьці працаўладкоўваўся ў Беларусі.

Таму падумайце пра лічбавую бяспеку — на ўсялякі выпадак "пачысціце" графу "адукацыя" ў сацыяльных сетках. І не захоўвайце дома на бачным месцы не толькі дыпломы, але і наогул сімволіку універсітэта, раіць Праскаловіч.

— Але ў тых, хто свае дыпломы рэжыму не дэманстраваў, праблем быць не павінна.

Што будзе з новымі выпускнікамі? Тут складаней: чалавек павінен разумець, што калі ён паступае ў навучальную ўстанову пасля прызнання яе экстрэмісцкай арганізацыяй, пытанняў да яго будзе больш. Ездзіць на вакацыі ў Беларусь не варта.

А як было б у нармальнай краіне?

Складана арыентавацца на нейкія прававыя рамкі, каментуючы гэтую навіну, кажа наш суразмоўца. Ён тлумачыць: падыход рэжыму Аляксандра Лукашэнкі да пераследу ўсіх, хто мае сувязь з "экстрэмісцкай арганізацыяй" абсалютна неправавы.

— Не кажучы пра тое, што ў Беларусі пад экстрэмізмам разумеюць усё, што толькі магчыма, улады яшчэ і адкручваюць стрэлкі гадзіннікаў на тры, пяць гадоў таму і прыцягваюць да адказнасці людзей за фотаздымкі нацыянальнага сцяга, якія людзі выкладвалі на сваіх старонках у 2018 годзе.