СК завёў крымінальную справу на ўдзельнікаў святкавання "Дня Волі" за мяжой

Следчы камітэт Беларусі завёў крымінальную справу супраць удзельнікаў святкавання "Дня Волі". Гаворка пра мерапрыемствы, якія сёлета прайшлі за мяжой. Справа заведзеная паводле двух артыкулаў КК: стварэнне экстрэмісцкага фармавання і ўдзел у ім (арт.361-1) і Дыскрэдытацыя Рэспублікі Беларусь (арт. 369-1).

Па версіі следства, прадстаўнікі дыяспар сваімі святочнымі дзеяннямі спрабавалі "рэалізаваць нейкі злачынны план" і мелі "намер нанясення шкоды стратэгічным нацыянальным інтарэсам Рэспублікі Беларусь". Святочныя мерапрыемствы, якія ў СК назвалі "сходкамі прадстаўнікоў радыкалаў", на думку следчых, былі накіраваныя "на дыскрэдытацыю краіны". Акрамя таго, сустрэчы і канцэрты "суправаджаліся выкарыстаннем нацыяналістычнай сімволікі, абразлівымі лозунгамі, якія распальваюць сацыяльную варожасць сярод беларусаў, заклікамі да эканамічнага і палітычнага ціску на нашу краіну".

У СК кажуць, што ў іх ёсць "дадзеныя больш за сотню асоб, якія прымалі непасрэдны ўдзел у вулічных акцыях" у Варшаве, Вільні, Вроцлаве, Беластоку, Брусэлі, Батумі, Празе, Каліфорніі, Філадэльфіі. Удзельнікі святочных мерапрыемстваў сталі падазраванымі па гэтай крымінальнай справе. СК пагражае ім канфіскацыяй маёмасці.

"Цяпер праводзяцца следчыя дзеянні, у тым ліку агляды, ператрусы, накладанне арышту на маёмасць і іншыя працэсуальныя мерапрыемствы", — заявіў афіцыйны прадстаўнік СК Сяргей Кабаковіч.

Нагадаем, 100-годдзе БНР у 2018 годзе беларускія ўлады дазволілі адзначыць у цэнтры Менска ля Опернага тэатра. У той год Дзень Волі ў цэнтры горада святкавалі каля 20 тысяч чалавек.