Сталі вядомыя падрабязнасці звальнення фатографа БЕЛТА, якая пераехала ў Польшчу
Аксана Манчук / БЕЛТА
Былая фатографка БЕЛТА Аксана Манчук, якая здымала пратэсты і суды над палітвязнямі, не магла звольніцца з дзяржаўнага медыя раней. Аб гэтым піша "Наша Ніва" са спасылкай на знаёмага Аксаны.
"У 2019 годзе ў яе скралі фотатэхніку (камеру і аб'ектывы), якая належыць БЕЛТА, на вельмі вялікую суму грошай. Быў суд у 2020 годзе, і па рашэнні суда яна была вымушана выплачваць кампенсацыю за скрадзеную тэхніку", — распавёў знаёмы. Манчук звольнілася адразу, як толькі змагла пакрыць усю суму. Гэта адбылося ў снежні 2022 года. Пасля гэтага яна перабралася ў Польшчу.
Суразмоўца выдання таксама адзначыў, што дзяўчына ў мэтах бяспекі не гатова каментаваць сітуацыю. Яна баіцца за блізкіх, якія засталіся ў Беларусі.
