Сына Анатоля Лябедзькі не вызвалілі пасля 15 сутак арышту
Арцём Лябедзька / facebook.com/Anatol.Liabedzka
Сына палітыка Анатоля Лябедзькі Арцёма не вызвалілі пасля 15 сутак адміністрацыйнага арышту. Яго асудзілі на новы тэрмін — яшчэ на 15 сутак.
"[Прыдумалі] яшчэ адзін працэс, — піша Анатоль Лябедзька. — Такі ж агідны і мярзотны, як і папярэдні. Рака без берагоў, безчалавечнасць без чырвоных сцяжкоў. Страляюць, выставіўшы перад сабой, у першы шэраг, нашых блізкіх і родных. Для мяне гэта дно, у якога няма аніякай прывязкі да супрацьстаяння, ідэяў, лагераў. Людзі пераўтвараюцца ў істотаў, ў жывёліну".
Арцёма Лябедзьку затрымалі ў канцы сакавіка. Па версіі сілавікоў, ён "прыйшоў да будынку Кастрычніцкага РУУС [Мінска] і брыдка лаяўся, размахваў рукамі і чапляўся да супрацоўнікаў міліцыі". Зразумела, што нічога падобнага не было, але яго асудзілі і пакінулі за кратамі.
Былы лідар Аб'яднанай грамадзянскай партыі Анатоль Лябедзька жыве за мяжой. Раней у Беларусі яго таксама затрымлівалі. Цяпер ён з'яўляецца дарадцам Святланы Ціханоўскай па канстытуцыйнай рэформе і міжпарламенцкай супрацы.
