Сённяшнія студэнты-платнікі пазбегнуць абавязковага размеркавання — Іванец

Сённяшнія студэнты-платнікі не трапяць пад абавязковае размеркаванне. Гэтая норма закране толькі тых, хто паступіць вучыцца пасля ўступлення ў сілу новага закона. Пра гэта заявіў міністр адукацыі Андрэй Іванец.

"Змены ў заканадаўчую базу закрануць тых, хто будзе паступаць у нашы ўніверсітэты альбо каледжы пасля ўступлення ў сілу гэтых нормаў, гэта значыць тых, хто сёння навучаюцца на платным, гэтая навацыя тычыцца не будзе. Аднак скарыстацца правам на атрыманне першага працоўнага месца яны могуць", — цытуе БЕЛТА словы міністра.

Таксама Іванец заявіў, што адпрацоўка па размеркаванні не можа быць меншай за два гады: "Для таго, каб малады спецыяліст адбыўся, неабходна не менш за два гады".

Міністр называе платную адукацыю "формай сацыяльнай падтрымкі моладзі". Пра ўвядзенне адпрацоўкі для студэнтаў-платнікаў ён гаварыў на нарадзе ў Аляксандра Лукашэнкі 21 верасня.