Tanin Jazz: Пра новы праект ужо ніхто не скажа, што гэта жаночая музыка

Еўрарадыё: Таня, што цяпер адбываецца з праектам Tanin Jazz і як у вас ідуць справы?

Таццяна Гарошка: Калі казаць пра мяне ў праекце, то ў мяне новая творчая фаза. Мяне прэ! Я даўно не атрымлівала такога задавальнення ад ўласнай творчасці.

Шмат фактараў сышлося — знаёмства з Надзеяй Падрэз, новымі музыкамі. І неяк ўсіх нас прэ! Мы знаходзімся на адной хвалі. Я пастаянна ў прыўзнятым настроі і адчуваю аддачу ад таго, што я раблю. Людзі з нашага асяроддзя, якія ўжо нешта слухалі, кажуць: "Гэта крута!".

Надзея Падрэз: Скончыўся перыяд, калі яны нас падтрымлівалі. Цяпер яны настойваюць і крычаць: "Калі вы ўжо гэта зробіце? Калі мы ўсе пачуем у чыставым варыянце?".

Еўрарадыё: Распавядзіце пра новы праект. Ці можна сказаць, што гэта зусім новы гурт Tanin Jazz?

Таццяна Гарошка: Я ўвогуле не разумею тых артыстаў, якія робяць нешта новае проста таму, што прыйшоў час зрабіць нешта новае. І пачынаюць выдумляць новыя назвы. Мне здаецца, гэта глупства. Тым больш, калі задзейнічаны адзін і той жа чалавек, які гэта прасоўвае. Я лічу, што гэта проста новая фаза, новы альбом, новае бачанне, больш свежае і больш спелае.

Кардынальнае змяненне ў праекце — гэта мая гатоўнасць спяваць на беларускай мове. Мабыць, раней я проста не была гатовая да гэтага эмацыйна. Восенню я пазнаёмілася з Надзеяй Падрэз, якая і з'яўляецца аўтарам усіх нашых тэкстаў на беларускай мове. Гэтая ідэя даўно жыла ў маёй галаве, ды я ж і вучылася ў беларускамоўнай школе! (Рэспубліканскі каледж мастацтваў им.Ахремчика, — Еўрарадыё). Гэта абсалютна не палітычная тэма, спяваць на беларускай мове. Гэта проста прыгожа, і атрымліваецца на здзіўленне арганічна.

Надзея Падрэз: Я пішу не толькі на беларускай мове, але пісаць на мове для мяне асаблівае задавальненне. Раней у мяне не было досведу напісання тэкстаў на гатовую музыку, звычайна музычная фраза нараджаецца разам са словамі. Маёй задачай было акуратна абкласці іх, каб Тані зручна было гэта праспяваць.

Еўрарадыё: Пра што будуць новыя песні праекта Tanin Jazz?

Таццяна Гарошка: Пра жанчыну. Пра чалавека, які жыве ў горадзе. Самастойную спелую асобу, якая адкрыта кажа, што адчувае, без сарамлівасці або комплексаў. Ужо не той узрост, каб камплексаваць! Ужо ведаеш сябе, ведаеш, чаго ты хочаш, застаецца толькі расслабляцца і атрымліваць задавальненне!

Надзея Падрэз: У некаторых трэках мы паспрабавалі трохі выгаварыцца і правесці псіхааналіз. Мы досыць адкрыта і сумленна ідзем на тое, каб выказаць простую чалавечую патрэбу ў цяпле, зносінах — усё неяк па праўдзе, без упрыгожанняў.

Еўрарадыё: Якім атрымліваецца альбом?

Таццяна Гарошка: Напэўна, я магла б ахарактарызаваць гэты альбом ужо з першага трэка, калі пачала яго пісаць. Пасля папярэдняга альбома ў мяне было жаданне напісаць нешта танцавальнае і пазітыўнае. Ніякіх медлякоў! Проста чалавек прыходзіць на канцэрт, і яго не адпускае! Я думаю, што ўжо ніхто не скажа, што гэта "жаночая музыка". Мне здаецца, гэта мог бы праспяваць і мужчына. Па характары і настроі там няма слабасці і жаноцкасці. "Я такая рамантычная, мяккая і ружовая" — такога там няма. Калі мы пачыналі рабіць праект, я сказала, што мы запалім. І я не перабольшваю! Увесь альбом накіраваны на тое, каб запальваць і хутчэй разняволіць людзей. Каб у іх не засталося больш выбару — толькі танцаваць!

Надзея Падрэз: Да таго ж, загалоўная кампазіцыя альбома называецца "Адліга". Зладзім адлігу і растопім лёд на беларускай мове!

Таццяна Гарошка: Над альбомам мы працуем з лістапада, і ён ужо амаль скончаны. На сцэне будуць тры чалавекі: я, бубнач (Аляксей Максімаў) і гітарыст (Аляксей Англінскі). Я хачу дамагчыся магутнасці не за кошт колькасці музыкаў, якія граюць на жыва — паводле майго досведу, гэта заўсёды ператвараецца ў джаз! (Смяюцца) Таму гэта будзе магутны прадуманы плэйбэк, што, вядома, нас набліжае да клубнага танцавальнага гучання. Будзе гучна! Вядома, усё ў межах танцавальных тэмпаў — не будзе лаунжа і медлякоў. Можа быць, нешта дыпавае і філасофска-задуменнае, але, тым не менш, усё роўна ў руху.

Мне падабаецца тое, што атрымліваецца. Я даўно шукала такі фармат. А пасля таго, як мы з'ездзілі на Koktebel Jazz Festival, я паглядзела на вялікую сцэну і сказала: я хачу туды!

Еўрарадыё: Ці было нешта акрамя фестывалю Koktebel Jazz Festival, што цябе натхніла на стварэнне танцавальнага праекта?

Таццяна Гарошка: Насамрэч, гэта заўсёды ўва мне сядзела. Гэта такая эмацыйная хваля, якая цяпер выплёскваецца, дзякуючы таму, што з'явіўся новы фармат, з'явіліся тэксты, якія зручна спяваць. Усё ж такі, я арыентуюся на заходнюю музыку.

Надзея Падрэз: У гэтым супрацоўніцтве я даведалася шмат новага пра цікавыя магчымасці беларускай мовы. Трошкі складана было падладзіцца пад кароткія рэфрэны, якімі Таня часам любіць (смяюцца). Мне яшчэ ўдалося пахуліганіць! Гаворка ідзе пра адну з нашых кампазіцый, якая называецца "Лівень". Гэтая песня ўжо была напісаная Таняй на англійскай мове, і вось стаяла задача напісаць для яе беларускі тэкст. Не буду раскрываць усіх таямніц, няхай слухачы самі ўбачаць, як цікава беларускі тэкст можа ўплятаць ў англійскі, літаральна рэхам дагаворваюцца слова. Мы пачынаем на беларускай, а працягваем фактычна тымі ж складамі на англійскай. Але ў выніку гэта адзін складны агульны тэкст, які можна падзяліць на два.

Еўрарадыё: Не магу не задаць гэтае пытанне: чаму ты вырашыла запрасіць у праект новых музыкаў і ці будзе існаваць Tanin Jazz ў тым фармаце квартэта, да якога мы прызвычаіліся за гэтыя гады?

Таццяна Гарошка: Вядома! Я буду па ім вельмі сумаваць. У Tanin Jazz ў калабарацыі з трыа Косці Гарачага ўкладзена шмат сіл, і я яго люблю. І не выключаю, што і ў гэтым праекце з'явяцца песні на беларускай мове. Я люблю разнастайнасць, і цалкам магчыма, што я паезджу з канцэртамі па клубах, і мне захочацца расслабленага джаза. Калі я займаюся электроннай музыкай, то сумую па джазавым гучанні. І наадварот. Я ў сабе гэта прымеціла, і не спяшаюся расставацца ні з адным, ні з іншым праектам. Гэта такія творчыя фазы. Гэтыя праекты існуюць паралельна. Мы займаем нішы беларускай музыкі!

Еўрарадыё: Назва для абодвух праектаў будзе адной і той жа? Як тады слухач зможа адрозніць, дзе Tanin Jazz грае дыска, а дзе уласна джаз?

Таццяна Гарошка: Па афішы адразу будзе бачна, дзе які фармат. Я думаю, будзе напісана Tanin Jazz і трыа Косці Гарачага — і будзе ўсё зразумела. Ці проста Tanin Jazz.

Еўрарадыё: Калі плануеце рэліз і прэзентацыю новай праграмы?

Таццяна Гарошка: Я планую пачаць выступы да таго, як выйдзе альбом. Мне вельмі хочацца рэакцыі гледачоў і новага кантакту з імі. У чэрвені мы плануем выпусціць сінгл ці нават ЕР, і дапоўніць яго кліпам. Чатыры новыя кампазіцыі мы пакажам падчас 5-га фестывалю AD.NAK! А 17-га ліпеня мы бярэм удзел у фестывалі ў клубе Re: Public. Мы адкрытыя для прапаноў.

Еўрарадыё: Гэта будзе першы кліп Tanin Jazz. Каму даверылі рэжысёрскую працу?

Таццяна Гарошка: Вакол нас цяпер збіраецца нейкая творчая групоўка! Надзея запрасіла ў праект Ганну Герт, таленавітую рэжысёрку, фатографа і дызайнера. Ганна зняла для нас кліп на кампазіцыю "Збегчы". Маёй задачай у кліпе было прыгожа стаяць у капелюшы, мне вельмі спадабалася гэтая ідэя! (Смяецца)

Песня "Збегчы" была зробленая сумесна са Сцяпанам Бітусам, які цяпер жыве ў Вільні і вядзе там паспяховае музычнае жыццё. Сумесна са Сцяпанам у нас быў праект Monsoon Sexy Season, з якім мы шмат выступалі. Але мы жывем у розных гарадах, і цяжка было гэта сумяшчаць. У нас засталося шмат матэрыялу, які я вырашыла выкарыстоўваць у новым праекце. Так мы ўзялі за аснову адну з кампазіцый, для якой запісалі гітару і барабаны. Надзея напісала тэкст. У выніку песня так спадабалася Сцяпану, што ён прапанаваў яе выпусціць на адным з лэйблаў Нью-Ёрка, з якім даўно працуе сам. У Нью-Ёрку, вядома, аказалася складана прыняць кампазіцыю не на англійскай мове, але мы ўсё роўна прынялі рашэнне выпусціць яе на вініле.

Але пакуль у мяне ў галаве круцяцца дыскі і дыска (смяецца), я хацела б у першую чаргу скончыць працу над альбомам. А наогул, мы адкрытыя для любых прапаноў і эксперыментаў!

За навінамі гурта можна сачыць на сайце каманды taninjazz.by. Плануецца, што Tanin Jazz возьме ўдзел у шэрагу летніх фестываляў, якія будуць абвешчаныя ў хуткім часе.

Фота: Еўрарадыё, Ганна Герт, Юлія Кухарэнка.