У Беларусі прызналі палітвязнямі яшчэ 8 чалавек
Пратэсты ў верасні 2020-га ў Мінску / З архіва Еўрарадыё
Беларускія праваабаронцы прызналі палітвязнямі яшчэ 8 чалавек. Гэта — Яўген Каваленка, Сяргей Еўдакіменка, Антон Дзянэйка, Павел Абозны, Алена Яфрэменка, Уладзіслаў Пудзяк, Руслан Захарчанка і Уладзіслаў Беладзед. Праваабаронцы лічаць іх справы палітычна матываванымі і патрабуюць вызвалення.
Каваленка асуджаны на 2 гады і 6 месяцаў зняволення па шматлікіх артыкулах, у тым ліку за "абразу Лукашэнкі" і "паклёп" на яго. Еўдакіменка асуджаны на 7 гадоў пазбаўлення волі па абвінавачанні ў "саўдзельніцтве ў распальванні варожасці" — за перадачу звестак пра прадстаўнікоў дзяржаўнай улады пратэсным інфармацыйным рэсурсам. Дзянэйка асуджаны на 5 гадоў зняволення па абвінавачанні ў пагрозах супрацоўнікам міліцыі і службовым асобам, у "абразе Лукашэнкі" і прадстаўнікоў улады. Абозны асуджаны на 5 гадоў зняволення па некалькіх артыкулах, у тым ліку за намер далучыцца да абаронцаў Украіны. Ён — чэмпіён Еўропы па кікбоксінгу.
На сённяшні дзень у Беларусі налічваецца 1489 палітвязняў.
