У Беларусі заблакавалі доступ да сайта "Асацыяцыі палітвязняў Беларусі"
Сайт "Асацыяцыі палітвязняў Беларусі" / apbel.com
Улады РБ абмежавалі доступ да сайта "Асацыяцыі палітвязняў Беларусі" (apbel.com). Рашэнне прыняў пракурор Магілёўскай вобласці, а выканала Дзяржінспекцыя па электрасувязі Міністэрства сувязі і інфармацыі.
Магілёўскі пракурор палічыў, што рэсурс парушае Закон "Аб СМІ". "У прыватнасці, на партале размяшчаліся інфармацыйныя матэрыялы, якія маюць прыкметы экстрэмізму і скіраваныя на дыскрэдытацыю органаў улады", — гаворыцца ў паведамленні пракуратуры. А яшчэ сайт, на думку чыноўнікаў Лукашэнкі, сваімі публікацыямі "легітымізаваў" учынкі палітвязняў, і наогул палітвязні — гэта "псеўдастатус". А згодна з Законам "Аб СМІ", на інтэрнэт-рэсурсах "забаронены распаўсюд інфармацыі, скіраванай на прапаганду вайны, экстрэмісцкай дзейнасці або з заклікамі да такой дзейнасці, іншай інфармацыі, распаўсюд якой здольны нанесці шкоду нацыянальным інтарэсам" Беларусі.
Адзначым, што "Асацыяцыя палітвязняў Беларусі" была створаная ў 2024 годзе былымі палітвязнямі, якія вымушана з'ехалі з краіны. Яны дапамагаюць іншым палітвязням, а таксама іх сем'ям у Беларусі і за мяжой. Станам на 18 ліпеня статус палітвязня мае 1388 чалавек.
