У Гродне хлопец кінуў у твар дзяўчыне жменю манет і паказаў геніталіі
У Гродне хлопец кінуў у твар незнаёмай дзяўчыне жменю манет і паказаў геніталіі. Таксама зламыснік нанёс ёй два ўдары нагамі ў жывот. Здарэнне адбылося каля паловы на пятую гадзіну раніцы на прыпынку грамадскага транспарту каля аднаго з начных клубаў.
Як інфармуе афіцыйны прадстаўнік УУС Гродзенскага аблвыканкама Яраслаў Васілеўскі, хлопец з сябрам адпачывалі ў начным клубе. На прыпынак яны прыйшлі адтуль. Неадэкватныя паводзіны малады чалавек прадэманстраваў пасля таго, як дзяўчына не захацела з ім размаўляць. Вядома, што дзяўчыну абараніла іншая кампанія маладых людзей, якая праходзіла міма. Калі на месца прыехала міліцыя, у раёне прыпынку грамадскага транспарту заставаўся толькі той самы хуліган. Цяпер праваахоўнікі шукаюць пацярпелую дзяўчыну, якой на выгляд 22-26 гадоў, а таксама хлопцаў, якія яе абаранілі.
