У Лідзе на магіле ксяндза Адама Фалькоўскага знік герб вызваленчага паўстання
На фота злева герб паўстання яшчэ ёсць, на здымку справа ён ужо адсутнічае / t.me/spadczyna/
У Лідзе на магіле ксяндза Адама Фалькоўскага знік герб вызваленчага паўстання 1863-1864 гадоў. "Пагоню", польскага белага арла і анёла на камені зацерлі невядомыя, піша @spadczyna.
Ксёндз Фалькоўскі быў расстраляны рускімі войскамі ў Лідзе ў 1863-м за актыўную падтрымку паўстання Кастуся Каліноўскага. Вандалізм на месцы пахавання святара — з'ява не новая: спачатку камяні вакол магілы раскідвала царская паліцыя, у 1940 годзе крыж знішчылі савецкія ўлады. З тымі крыжамі, што ставілі мясцовыя жыхары ў 1990-я ў гарадскім парку, упарта змагаліся чыноўнікі. Толькі ў 2010-м з дазволу мясцовых уладаў крыж замянілі на камень. Але праз 13 гадоў ён зноў аказаўся "ідэалагічна няправільным".
