У Лукашэнкі знайшоўся кавалачак зямлі ля мора
Шэйман і іншыя датычныя да зямлі Лукашэнкі ля мора / Калаж БРЦ (створаны пры дапамозе AI)
У Лукашэнкі ёсць кавалачак зямлі на беразе Чорнага мора. Ён атрымаў яго ў верасні 2022 года, на наступны дзень пасля візіту ў Абхазію, акупаваную расіянамі.
Як высветлілі расследавальнікі з БРЦ, 20 гектараў зямлі "для рэалізацыі буйнога інвестыцыйнага праекта" ў вёсцы Кындыг належаць зарэгістраванаму ў Абхазіі ТАА "Жемчужина 2010". Гэтая кампанія на 90% належыць былому ахоўніку Лукашэнкі Аляксандру Раманоўскаму і на 10% — грамадзяніну Абхазіі Дато Квіцыніі.
Квіцынія ў размове з журналістамі пацвердзіў, што ён — падстаўная асоба для афармлення дакументаў.
"Я наогул не ў курсе... Паперы, па-мойму, на мяне зробленыя. Я нават не ў курсе, што там робяць, што не робяць", — сказаў саўладальнік "Жемчужины 2010". І дадаў, што за фармальны ўдзел у кампаніі яму заплацілі: "За дарогу, што я ездзіў, мае паслугі, а так, каб мне заплацілі... Асабліва вялікай сумы не далі".
Раманоўскі даўно фігуруе як саўладальнік бізнесаў, звязаных з Віктарам Шэйманам, "загадычкам гаспадаркай" Лукашэнкі.
Дакладны кошт участка невядомы. Але непадалёк 1 гектар зямлі прадаецца за $320 тысяч. Гэта значыць, участак, які атрымаў Лукашэнка, можа каштаваць каля $6,5 млн.
