У Пінскім раёне мужчына пагражаў міліцыянтам паляўнічай стрэльбай
У Пінскім раёне 7 лютага міліцыянты з дапамогай службовага сабакі затрымалі жыхара Ганцавіцкага раёна, якога падазраюць у серыі крадзяжоў маёмасці з лецішчаў. Пра гэта паведамляе прэс-служба УУС Брэсцкага аблвыканкама.
Знайсці правапарушальніка дапамагла аўчарка Боня. Міліцыянт-кінолаг прайшоў з сабакам па следзе зламысніка каля шасці кіламетраў. Падазраванага яны заўважылі на ўскрайку лесу. Мужчына спрабаваў супраціўляцца і накіраваў у бок міліцыянта паляўнічую стрэльбу. Затрымаць яго ўдалося дзякуючы маланкавай рэакцыі Боні. Зламысніка перадалі следча-аператыўнай групе Пінскага РАУС.
Праваахоўнікі высветлілі, што мужчына мае дачыненне да чатырох фактаў крадзяжу.