У Смаргонскім раёне 9-гадовы хлопчык траўмаваў сякерай палец 6-гадовай сястры
У вёсцы Пазборцы Смаргонскага раёна 9-гадовы хлопчык траўмаваў сякерай палец 6-гадовай сястры. Дзяўчынку тэрмінова адвезлі ў адну з бальніц Мінска. Следчы камітэт праводзіць праверку.
Як інфармуе афіцыйны прадстаўнік УСК па Гродзенскай вобласці Сяргей Шаршаневіч, здарэнне адбылося ў сераду, 7 чэрвеня, каля 12.00 на падворку прыватнага дома. Сястра папрасіла брата адсекчы сякерай вяроўку, ён паспрабаваў і патрапіў ёй па левай руцэ. Спачатку дзяўчынку завезлі ў раённую бальніцу, а ўжо адтуль — у сталіцу. Дыягназ — “Траўматычная ампутацыя трэцяга пальца левай кісці”.
Праваахоўнікі і эксперты агледзелі месца здарэння, апыталі сваякоў дзяцей і суседзяў. Была прызначана судова-медыцынская экспертыза. Высветлілася, што дзеці выхоўваюцца ў сям’і, якая жыве ў Мінску. Атрыманыя толькі станоўчыя яе характарыстыкі. У момант здарэння дарослыя працавалі на прысядзібным участку, малыя дзеці заставаліся без нагляду. Пры гэтым сякера была ў свабодным доступе.
