Урад Літвы можа сысці ў адстаўку праз транзіт беларускага калію
Нягледзячы на санкцыі, транзіт беларускага калію праз Літву працягваецца / AFP
Прэм'ер-міністр Літвы Інгрыда Шыманітэ не выключыла адстаўкі ўсяго ўраду праз далейшы транзіт угнаенняў "Беларуськалія". На мінулым тыдні ўступілі ў сілу санкцыі ЗША супраць прадпрыемства, але транзіт праз Літву беларускага калію спынены не быў.
"Я не выключаю такой магчымасці, магу наўпроста сказаць пра гэта", — цытуе Шыманітэ агенцтва delfi. Паводле яе словаў, калі ў дачыненні да дзейнага ўрада ўзнікае так шмат пытанняў, то яму мае сэнс спыніць працу. "І нейкі новы ўрад мог бы працягнуць працу з нуля", — выказалася літоўскі прэм'ер-міністр.
Раней пра намер сысці ў адстаўку заявілі літоўскія міністры замежных спраў Габрыэлюс Ландсбергіс і транспарту Марус Скуодзіс. Яны не згодныя з тым, што беларускае прадпрыемства працягвае вазіць сваю прадукцыю праз Літву.
Літоўскія чыгуначнікі тлумачаць свой намер і далей аказваць паслугі "Беларуськалію" тым, што наўпрост санкцыі ЗША іх не закранаюць, як і еўрапейскія, у якіх дастаткова выключэнняў.
