Версіі следства па справе Нямцова: ад палітыкі да асабістай непрыязні

Следчыя разглядаюць усе версіі забойства расійскага апазіцыянера Барыса Нямцова, якога застрэлілі позна ўвечары 27 лютага ў цэнтры Масквы. Адна з версій — забойства было замоўленым. Пра гэта журналістам паведамілі прадстаўнік Следчага камітэту па Маскве Юлія Іванова.

Крыніца агенцтва “Інтэрфакс” у праваахоўных органах пацвярджае, што забойства сапраўды магло быць замоўленым, а таксама звяртае ўвагу на той факт, што злачынства здзейсненае напярэдадні апазіцыйнага марша, запланаванага на 1 сакавіка. Таму злачынства можа насіць “правакацыйны характар”.

Іншая крыніца удакладняе, што таксама разглядаюцца версіі, звязаныя з палітычнай дзейнасцю Нямцова і яго працай на пасадзе дэпутата Яраслаўскай абласной думы. Не адсоўваецца і версія, звязаная з асабістай непрыязню.

У сваю чаргу адвакат Нямцова Вадзім Прохараў распавёў “Інтэрфаксу”, што палітык атрымліваў пагрозы ў сацыяльных сетках, але гэта было некалькі месяцаў таму.

Барыс Нямцоў быў застрэлены позна ўвечары 27 лютага каля 23.00 у цэнтры Масквы. Ён прагульваўся па мосце са сваёй сяброўкай, якая прыехала з Украіны. Раптам пад'ехаў белы аўтамабіль, з якога раздаліся 4 ці 6 стрэлаў. Ад атрыманых траўмаў палітык памёр на месцы.

1 сакавіка расійская апазіцыя плануе зладзіць жалобную акцыю ў цэнтры Масквы, замест раней запланаванага антыкрызіснага маршу “Вясна”.