Віктар Бабарыка трапіў у лякарню з слядамі збіцця — "Рабочы рух"
Віктар Бабарыка / Reuters
Увечары 26 красавіка з'явіліся звесткі, што Віктар Бабарыка трапіў у Наваполацкую цэнтральную гарадскую бальніцу з слядамі збіцця.
"Рабочы рух", спасылаючыся на свае крыніцы, паведаміў, што палітвязня даставілі з калоніі ў ноч з 24 на 25 красавіка.
"Віктар Бабарыка знаходзіцца ў аддзяленні хірургіі, стан сярэдняй ступені цяжкасці, вядома, што ў яго пнеўматоракс. Паступіў з слядамі збіцця, яго нават не пазналі пакуль не ўбачылі прозвішча таго, хто паступіў", — гаворыцца ў паведамленні "Рабочага руху".
Пазней інфармацыю пра шпіталізацыю пацвердзіла і прэс-служба Бабарыкі.
Каментуючы гэтую інфармацыю, Святлана Ціханоўская запатрабавала публічна прадэманстраваць, у якім стане знаходзіцца Бабарыка, і дапусціціь да яго адвакатаў і сваякоў.
"Любыя іншыя дзеянні будуць трактавацца як наўмыснае прычыненне шкоды жыццю і здароўю", — заявіла яна.
