“Запалохваюць сябе і ўсіх навокал”: навошта мяняюць закон пра ваеннае становішча

Ну і заўважце: праходзяць таксама і ваенныя зборы, у якіх задзейнічаныя адразу і армейскі, і міліцэйскі спецназ — усе разам. І сутнасць іх — адпрацоўка па ДРГ. То бок, гэта [не толькі магчымыя змены ў закон, а] комплекс мерапрыемстваў, — кажа стваральнік Белага Легіена Сяргей Бульба.

Бульба нагадвае, што яшчэ ў маі Беларусь вырашыла ўсталяваць часовыя кантрольна-прапускныя пункты на мяжы з Расіяй і правяраць дакументы ва ўсіх, хто заязджае з расійскага боку. Ён кажа, што гэта таксама сведчанне таго, што “яны апасаюцца”.

Але ж раней у эфірах Еўрарадыё Бульба казаў, што сілаў беларускіх добраахвотнікаў недастаткова для таго, каб са зброяй пайсці не Беларусь. У нашай размове ён пацвердзіў гэтую ўпэўненасць.

— Да таго ж, калі ў расіян не было нават у галаве, што нехта можа зайсці на іх тэрыторыю, дык беларусы да гэтага ўжо паўтары гады рыхтуюцца.

Ды і зрабіце апытанку сярод беларусаў — але не тых, якія слухаюць Еўрарадыё. Акажацца, што нашыя каліноўцы папулярныя сярод пэўнага адсотку людзей — пераважна дыяспары. А сярод беларусаў унутры карціна іншая. Іх не будуць успрымаць як вызваліцеляў.

Ды і самой Украіне крытычна непатрэбны другі фронт. І гэта галоўнае тлумачэнне, чаму дагэтуль ніхто не пайшоў адтуль на Беларусь, кажа Бульба.

— І, верагодна, не пойдзе, — дадае ён. — Мой дзед падчас вайны быў начальнікам партызанскага аэрадрому. Ён прыгадваў, што яшчэ ў 42-ім годзе за адным сталом у вёсцы збіраліся і партызаны, і паліцаі. Бо ўсе ж свае. Збіраліся і вырашалі, як далей жыць. Вось і кантакты паміж беларускім КДБ і СБУ ніколі не прыпыняліся.

Вадзім Кабанчук: “Ваеннае становішча дэ-факта ўжо ўведзенае”

— Яны баяцца толькі сілы. Любы гопнік разумее толькі кулак, які паднесены пад нос. І гэта тычыцца і беларускіх, і расійскіх улад, — лічыць намеснік камандзіра Палка Каліноўскага Вадзім Кабанчук. — Яны манітораць тое, што адбываецца ў Белгародскай вобласці і, мякка кажучы, вельмі турбуюцца за гэта.

Гэта пытанне для мяне трохі дзіўнае, бо мы падпарадкоўваемся ЗСУ. Усе сілы ЗСУ зараз на ўсходзе і поўдні краіны. Так, на беларуска-украінскай мяжы адбываюцца “тролінгі” — памежнікі ставяць нейкія песні адно аднаму. Калі гэтыя дзеянні беларускіх памежнікаў нярвуюць — ну, хай апасаюцца.

А казаць пра нейкія прарывы — ну, не мая кампетэнцыя гэта каментаваць. Я ж не ўкраінскі Генштаб.

Мы пытаемся: а ці могуць гэтыя змены ў законапраект быць прымеркаваныя да правакацыі? Абвясціўшы народу пра спробу ўмоўнага каліноўца патрапіць у Беларусь, можна ўвесці ваеннае становішча і кантраляваць усе сферы жыцця грамадства. Ёсць маленечкае “але”, на якое звяртае ўвагу Кабанчук:

— Не бачу, што кардынальна зменіць для рэжыму Лукашэнкі ўвядзенне ваеннага становішча. Фактычна яно было ўведзенае ў 2020-м годзе. Ён не аб’яўляе яго дэ-юрэ — але на што гэта ўплывае?

Яны задзейнічалі супраць мірнага народа ўсё, што захацелі. Якія яшчэ “плюшкі” дасць ім увядзенне ваеннага становішча?

Добраахвотнік Алесь: “Улады разумеюць, што добраахвотнікі без праблем увойдуць у любы населены пункт”

Яшчэ адзін добраахвотнік, які ў нашай размове пажадаў захаваць ананімнасць, упэўнены, што “афіцыйны Мінск” спужаўся падзеяў у Белгародскай вобласці.

— Калі яхта Чэ Гевары заходзіла на Кубу, на борце было ўсяго толькі 82 чалавекі. Але яны здолелі здзейсніць рэвалюцыю. Байцы РДК здолелі захапіць населены пункт і ўтрымліваюць яго.

А ў беларусаў жа ёсць Полк Каліноўскага, БДК і шэраг іншых падраздзяленняў.

У Дабраахвотніцкага корпуса і АСП "Тэрор" ёсць вопыт фарсіравання ракі ў раёне Новай Кахоўкі і вопыт дыверсійных аперацый у Белгарадзе. У ПКК ёсць матэрыяльная база. Ёсць яшчэ і іншыя беларускія падраздзяленні. Усё гэта разам — магутны рэсурс, пры ўмове, што гэтыя падраздзяленні здолеюць аб'яднацца. І тады ў буйны населены пункт Беларусі яны ўвойдуць без праблем.