Жанчына ў Светлагорску звалілася з восьмага паверху (фота)
Трагічнае здарэнне адбылося 14 лістапада ў Светлагорску на Гомельшчыне. Прыкладна а палове 12-й дня медыкаў выклікалі на вуліцу Шашэйную. Там з акна восьмага паверху звалілася жанчына.
Як паведамляе ranak.by, жанчына была яшчэ жывая, калі медыкі прыбылі на месца здарэння. У вельмі цяжкім стане яе даставілі ў лякарню. Лекары некалькі гадзін змагаліся за яе жыццё. Аднак каля 15-й гадзіны стала вядома, што пацярпелая памерла.
Вядома, што жанчыне было 35 гадоў. Па словах суседзяў, у яе быў непаўналетні сын. На момант трагедыі хлопчык знаходзіўся ў школе.
Праваахоўнікі высвятляюць, быў гэта няшчасны выпадак, спроба суіцыду ці нешта іншае.
