"120 лекараў і фармацэўтаў": хто прыляцеў у Мінск з Багдада

16 чэрвеня ў Мінску прызямліўся самалёт, які прыляцеў з Багдада. Рэйс выконвала авіякампанія "Iraqi Airways".

На фоне таго, што літоўскія памежнікі ўсё часцей выяўляюць на беларуска-літоўскай мяжы нелегальных мігрантаў, у тым ліку з Ірака, нідэрландскае выданне "De Gelderlander" піша, што Беларусь замяшаная ў транзіце нелегалаў на тэрыторыю ЕС. Згадваецца таксама "Iraqi Airways".

Пры гэтым Лукашэнка ў канцы траўня заявіў:

— Мы спынялі наркотыкі і мігрантаў — цяпер будзеце самі [ЕС . — Еўрарадыё] іх есці і лавіць.

Паколькі сітуацыя з нелегальнымі мігрантамі выглядае неадназначна, журналіст Еўрарадыё адправіўся сустракаць рэйс "Багдад — Мінск", каб паглядзець, хто прыбывае ў Беларусь з Ірака і ці чакае хто-небудзь гасцей.

“Ім не мае сэнсу тут заставацца”

Да прыбыцця рэйса ў сектары прылёту з'яўляецца стойка з лагатыпамі турыстычнай кампаніі "Oscar Tur". Паступова выходзяць пасажыры арабскай знешнасці. Усяго каля 100 чалавек.

У натоўпе можна кагосьці ўпусціць, але пераважная большасць, якія прыляцелі з Ірака, дакладна падыходзяць да стойкі. Там арганізатары звяраюць нейкія спісы, перакладаюць імянныя канверты, раздаюць невялікія падарункавыя наборы з мёдам і нечым падобным да мыла.

Цікавімся ў людзей за стойкай, чаму да іх падыходзіць так шмат людзей.

— Мы — турыстычная кампанія "Oscar Tur". Сустракаем турыстаў. Толькі мы прымаем 120 чалавек. Усяго павінна прыляцець сёння 350. Уся група — лекары і фармацэўты.

Мы заўважаем, што ў апошні час шмат чутак аб тым, што Беларусь замяшаная ў транзіце мігрантаў на тэрыторыю ЕС.

— Гавораць па-рознаму. Але лекары не будуць прыязджаць сюды, каб заставацца. Вось бачыце, у нас адразу гатовая гасцініца — "Renaissance", — расказвае суразмоўца, паказваючы на стос канвертаў з лагатыпам гатэля. — У Беларусі зусім няма замежных турыстаў, добра, што хаця б госці з арабскіх краін засталіся. У іншых фірм, можа, няма працы, і пачынаецца такое, адкуль чуткі. Вы разумееце. Мы гэта правяраем, каб усё было ў парадку.

Далей тыя, хто прыбыў рэйсам "Багдад — Мінск", разыходзяцца па абменніках, потым заходзяць у два вялікія аўтобусы, што чакаюць іх ля аэрапорта. 

— Паглядзіце, якія ў нас аўтобусы, — ківае наш суразмоўца, прабягаючы з паперамі.

Да "Renaissance" тыя ж аўтобусы, якія выехалі з аэрапорта, сапраўды даехалі. Але там адмовіліся ад дадатковых каментароў, спаслаўшыся на прыватнасць. 

Мы паспрабавалі аператыўна атрымаць у кампаніі "Oscar Tur" больш інфармацыі пра групу, якая прыбыла, але яны адмовіліся ад далейшых зносін.