ААН прызнала неправамерным пазбаўленне волі Максіма Знака

30/05/2022 - 11:02

Пазбаўленне волі Максіма Знака было неправамерным. Адпаведнае рашэнне прыняла Рабочая група па адвольных затрыманнях ААН, паведамляе юрыст Дзмітрый Лаеўскі.

Орган ААН разглядаў скаргу, якую абарона Максіма Знака падала яшчэ 4 кастрычніка 2020 года. У красавіку 2022-га меркаванне Рабочай групы наконт затрымання Знака было зацверджанае, а 21 траўня — накіраванае ўладам Беларусі.

Рабочая група па адвольных затрыманнях ААН заяўляе, пры пазбаўленні Максіма Знака волі былі парушаныя артыкулы 7, 9, 10, 11, 19, 20 і 21 Усеагульнай дэкларацыі правоў чалавека і артыкулы 9, 14, 19, 22, 25 і 26 пакта аб грамадзянскіх і палітычных правах. Затрыманне Знака эксперты ААН лічаць адвольным.

На іх думку, затрыманага Максіма Знака трэба неадкладна вызваліць і даць яму права на кампенсацыю. Рабочая група ААН заклікае ўрад Беларусі прыняць тэрміновыя захады для неадкладнага і безумоўнага вызвалення палітвязня.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.