Борыс Джонсан падтрымаў беларускіх палітвязняў і напісаў "Жыве Беларусь!"

Былы прэм'ер-міністр Вялікабрытаніі Борыс Джонсан запісаў відэа ў падтрымку Сяргея Ціханоўскага і іншых беларускіх палітвязняў (іх на сённяшні дзень каля паўтары тысячы). Ён заявіў, што падтрымлівае кампанію Святланы Ціханоўскай, мэта якой — нагадаць свету пра палітзняволеных у Беларусі.

Ролік ён апублікаваў у Х (экс-Twitter). А далучаны тэкст заканчваецца напісанымі па-беларуску словамі "Жыве Беларусь!"

У сакавіку Джонсан сустракаўся ў Лондане са Святланай Ціханоўскай. Яны абмеркавалі сітуацыю ў Беларусі, дзейнасць партызанаў у нашай краіне і добраахвотнікаў ва Украіне. Ціханоўская заклікала Борыса Джонсана "трымаць Беларусь на міжнародным парадку дня і ўзяць патранаж над адным з [беларускіх] палітвязняў". Ён абраў Ціханоўскага.

"Я вельмі ўдзячная Борысу Джонсану за падтрымку не толькі Сяргея, але і ўсіх беларускіх палітзняволеных, — піша Святлана Ціханоўская. — Мы ўсе павінны быць іх голасам. Кожны дзень нам трэба нагадваць свету пра нашых герояў, каб у рэжыма ні было магчымасці перагарнуць старонку".