Да канца года ў Беларусі збіраюцца адрамантаваць усе дарогі
Чыноўнікі глядзяць, як рамантуюцца дарогі / gp.by
Да канца года ў Беларусі збіраюцца адрамантаваць усе дарогі. Такую задачу на нарадзе з урадам паставіў "профільнаму віцэ-прэм'еру" Аляксандр Лукашэнка. Ён назваў праблему "пытаннем пытанняў".
"Быў час, калі Беларусь дасягнула высокага ўзроўню па стане дарожнага пакрыцця і стала прыкладам для многіх на постсавецкай прасторы, — гаварыў Лукашэнка. — Але варта было толькі крыху аслабіць кантроль, як сітуацыя стала пагаршацца".
З аднаго боку Аляксандр Лукашэнка папракаў чыноўнікаў, што людзі ўсё больш скардзяцца на стан дарог, а з іншага — скардзіўся на тых жа беларусаў. "Нашых грамадзян вельмі турбуе якасць дарог. Што тут казаць, усе на аўтамабілях, у некаторых па два-тры на сям'ю", — заявіў ён. І дадаў, што яны на рамонт дарог грошай даваць не хочуць. Але не стаў удакладняць, у чым прычына.
Праблема стану дарог актуальная для ўсёй краіны. У Гомельскай вобласці 45% дарог маюць "дэфекты пакрыцця". Грошай на іх рамонт не хапае, а атрымаць іх з Захаду з-за санкцый ужо немагчыма. У рэгіёнах нават пачалі праводзіць семінары па "ямачным рамонце".
