Эканоміка Беларусі будзе расці найбліжэйшымі гадамі, калі санкцыі не ўзмоцняцца

26/04/2023 - 18:28

Беларускі рубель будзе падаць, бо эканоміка мае нізкі патэнцыял росту / Еўрарадыё

Беларускі рубель будзе падаць, бо эканоміка мае нізкі патэнцыял росту / Еўрарадыё

Беларускую эканоміку найбліжэйшымі двума гадамі чакае аднаўленчы рост. Рэальныя заробкі таксама будуць расці, а вось курс беларускага рубля — падаць.

Такі прагноз даследчага цэнтра BEROC на 2023-2024 гады. Эксперты адзначаюць, што гэта базавы сцэнар. Ён прадугледжвае, што на беларускую эканоміку не зваліцца чарговага цуду, але і "чорны лебедзь" не прыляціць.

У такім выпадку ВУП Беларусі вырасце на 2,5% у 2023 годзе і на 1,1% — у 2024 годзе. Ёсць таксама важныя ўмовы выканання базавага сцэнару: не з'явіцца новых санкцый, новыя гандлёвыя шляхі не абарвуцца, улады працягнуць стымуляваць унутраны попыт.

Экономика Беларуси будет расти ближайшие годы, если санкции не станут жёстче

Паказчыкі пры базавым сцэнары / BEROC

Ёсць і мінусы. Стымуляванне попыту падганяе інфляцыю. Паводле сцэнару, яна складзе каля 8% па выніках 2023 года і 8,6% — у 2024 годзе.

Пры гэтым падтрымка дзяржпрадпрыемстваў умацуе рост рэальных заробкаў, які пачаўся ў другой палове 2022 года. Ён працягнецца ў 2023 годзе і складзе каля 8% у гадавым выражэнні.

"Калі не будзе новых шокаў, то Нацбанк працягне зніжаць стаўку рэфінансавання ў межах абранай ім стратэгіі стымулявання попыту без аглядкі на інфляцыю. Да канца года стаўка рэфінансавання складзе каля 9% і застанецца блізка гэтага ўзроўню ў 2024 годзе", — піша BEROC.

Беларускі рубель будзе слабець. Збольшага таму, што яго падтрымка з боку знешняга гандлю знізіцца ў 2023 годзе.

"Цэнавыя ўмовы гандлю да пачатку 2023 года ўжо пагоршыліся, і гэты працэс мае перадумовы да працягу на фоне карэкцыі сусветных коштаў на сыравіну і аслаблення расійскага рубля да долара, еўра і юаня", — адзначаецца ў прагнозе.

Знешні гандаль цісне на курс яшчэ і таму, што экспарт нарасціць няпроста, але стымуляванне ўнутранага попыту прывядзе да росту імпарту.

"У выніку прафіцыт знешняга гандлю можа прыкметна скараціцца ў 2023 годзе", — лічаць эканамісты.

Значыць, замежная валюта з краіны стане сыходзіць хутчэй, што падымае попыт на яе.

Курс беларускага рубля будзе таксама залежаць ад расійскага.

"Пры знаходжанні курсу USD/RUB блізка 80 расійскіх рублёў за долар курс USD/BYN складзе 2,92 беларускага рубля за долар у сярэднім за 2023 год", — гаворыцца ў прагнозе.

У 2024 годзе курс долара можа вырасці да 3,16 беларускага рубля.

"У 2024 годзе траекторыя аслаблення беларускага рубля захаваецца ў сувязі з нізкім патэнцыялам росту эканомікі краіны", — заключаюць эксперты.