Femen: У нас ёсць асабістыя прэтэнзіі да Аляксандра Лукашэнкі
Падчас падпісання пагаднення аб культурным супрацоўніцтве паміж Беларуссю і Украінай перад журналістамі выскачыла дзяўчына з аголенымі грудзьмі і пачала з выразным акцэнтам выкрыкваць лозунг "Жыве Беларусь!". У зале апроч прадстаўнікоў розных міністэрстваў абодвух краін прысутнічалі Аляксандр Лукашэнка і Пётр Парашэнка. Ахова прэзідэнта Украіны адрэагавала імгненна і цягам некалькіх секунд выцягнула невядомую з залы. Пры гэтым яна крычала "Stop dictatorship!". Еўрарадыё звязалася са стваральніцай і лідарам руху Femen Ганнай Гуцол.
Еўрарадыё: Ці была гэта загадзя падрыхтаваная акцыя?
Ганна Гуцол: Як толькі мы даведаліся, што Аляксандр Лукашэнка прыязджае ва Украіну, то адразу пачалі рыхтавацца. Бо мы абураныя тым, што ў краіне, у якой людзі змагаліся за свабоду і дэмакратыю, гінулі і гінуць дагэтуль, на афіцыйным узроўні прымаюць дыктатара Лукашэнку. Нашаму абурэнню проста няма меры, я думаю, што такому, як Лукашэнка, няма ўвогуле месца на нашай украінскай зямлі. І плюс у нас ёсць асабістыя прэтэнзіі да Аляксандра Лукашэнкі. Калі памятаеце, у 2011 годзе нашых актывістак падчас акцый супраць Лукашэнкі ў Мінску скралі супрацоўнікі КДБ, здзекваліся над імі, вывезлі іх у лес голымі, без дакументаў… Гэта было жудасна! Таму мы палічылі сваім абавязкам нагадаць Лукашэнку, хто ён ёсць і што яму не месца ў нармальнай дэмакратычнай краіне.
Еўрарадыё: Дзяўчыну, якая зладзіла акцыю, завуць Анджаліна Дзіаш, а якое ў яе грамадзянства, і чаму яна выкрыквала “Стоп дыктатура” на англійскай мове?
Ганна Гуцол: Яна ўкраінка! Яна сэкстрымістка і актывістка руху Femen. А наконт мовы, то гэты мэсадж не толькі для ўкраінцаў і беларусаў! Гэта мэсадж для усяго свету. То бок кожны чалавек у свеце мусіць пачуць, што Лукашэнка дыктатар і што дыктатуру трэба спыніць.
Ганна Гуцол (Фота talktome.com.ua)
Еўрарадыё: Калегі-журналісты казалі, што акрэдытавацца на гэтае мерапрыемства было вельмі складана. Як Анджаліне ўдалося гэта зрабіць і якое СМІ яна прадстаўляла?
Ганна Гуцол: Давайце мы гэта пакінем нашым сакрэтам. Бо ёсць яшчэ вельмі шмат месцаў, якія б мы хацелі наведаць. Але паверце, што калі Femen жадае куды-небудзь патрапіць, то яны абавязкова патрапяць. Але хацелася б параіць службе бяспекі быць больш уважлівымі і пільнымі! Добра, што гэта была актывістка Femen, якая з’яўляецца прадстаўніцай мірнага, негвалтоўнага руху. Добра, што гэта не нейкія тэрарысты, злачынцы. Таму трэба быць заўсёды ўважлівымі і напагатове.
Еўрарадыё: Чаму Анджаліна вырашыла пачаць акцыю падчас падпісання дамовы паміж двума міністрамі культуры?
Ганна Гуцол: Ведаеце, тут вельмі складана казаць, што як і чаму адбылося. Тут важна было знайсці такі момант, калі далёка ахова, калі ёсць магчымасць правесці пратэст… таму якія міністры і што дзе рабілі – ужо нюансы і не мае вялікага значэння. Для нас важна трапіць на мерапрыемства і зладзіць пратэст, а ўжо такія дробныя дэталі нас не хвалююць. Вы ж зразумейце наколькі гэта складана. Сядзяць два прэзідэнты, ахова, можа ўсё быць жорстка, таму часу паразважаць над дробнымі дэталямі няма.
Еўрарадыё: Вы ўзгадалі 2011 год. А што стала з тымі актывісткамі, якія былі затрыманыя ў Беларусі? Дзе яны цяпер і чым займаюцца?
Ганна Гуцол:Яны працягваюць знаходзіцца ў руху Femen, цяпер яны знаходзяцца ў Парыжы. У нас там галоўны офіс. Іна Шаўчэнка ўзначальвае наш інтэрнацыянальны рух.
Еўрарадыё: Ці вядома, што цяпер з Анджалінай?
Ганна Гуцол: На жаль, нічога не ведаем пакуль. Падазраем, што цяпер яна на допыце ў службе бяспекі прэзідэнта. Спадзяемся, што мы яе знойдзем у паліцыі. Разам з адвакатам мы цяпер яе вытэлефаноўваем і спрабуем знайсці. Але мы верым, што сітуацыя ва Украіне змянілася. Цяпер ужо не часы Януковіча. Дзякуй Богу, гэта не часы Лукашэнкі і гэта не яго краіна. Таму мы спадзяемся, што ўсё будзе добра, усё будзе ў прававым, юрыдычным рэчышчы, што мы з ёй сустрэнемся ў судзе, ці ў паліцыі, і вырашаць яе пытанне будзем па законе.
Еўрарадыё: Вярнемся да палітычнай тэмы. Ваша незадаволенасць прыманнем Лукашэнкі на такім высокім узроўні зразумелая, але ёсць жа і палітычныя, і эканамічныя дамоўленасці, якія цікавыя абодвум краінам?
Ганна Гуцол: Нам вельмі шмат казалі пра выгаду палітычных сувязяў з Расіяй і Пуціным, і цяпер мы бачым наступствы гэтага. Насамрэч, ніякія эканамічныя выгады не маюць значэння, калі парушаюцца правы і свабоды чалавека. У Беларусі яны парушаюцца. І мы з вамі сталі таму сведкамі. І мы не можам дазволіць, каб такое адбывалася ў нашай краіне, каб на афіцыйным узроўні прымалі дыктатара Лукашэнку. Гэта усё! Я думаю, яны ўсё роўна паміж сабой дамовяцца, але гэта наша права, гэта наша слова, і мы супраць.
Еўрарадыё: Як думаеце, ці сапсавалі вы настрой двум прэзідэнтам?
Ганна Гуцол: Думаю, так!
Еўрарадыё: Лукашэнка пакуль застаецца ў Кіеве. Ці чакаць якога працягу?
Ганна Гуцол: Гэта таксама сакрэт, які мы не будзем разгалошваць. Паверце, калі мы нешта задумалі і будзем рэалізоўваць, то вы гэта ўбачыце!
