"Гэта праверка": навошта міліцыя ходзіць па здымных кватэрах у Беларусі

— Патлумачыць не магу, проста ладзяцца пэўныя мерапрыемствы па адпрацоўцы жылога сектара. Хвалявацца дакладна не варта, калі б нейкія пытанні былі, то мы б адразу ж іх і задалі. Калі іх не задалі — значыць, усё добра. Я вам кажу, што нічога супрацьпраўнага не адбываецца і хвалявацца не варта.
— Проста хацелася б разумець, пра што гаворка.
— Ну, што тут тлумачыць, самі разумееце, здымнае жыллё, могуць розныя людзі здымаць: надзейныя, ненадзейныя, у вышуку, у пошуку і гэтак далей... Вось і адпрацоўваецца гэтая катэгорыя жылля. Каб усё было зразумела і празрыста. Таму не хвалюйцеся.

"Так, прыходзілі. Гэта праверка"

Са слоў міліцыянта зразумела, што рэйды і праўда былі, але ў чым іх сутнасць? Гэтым разам тэлефануем у Салігорск і расказваем тую ж легенду.

— Магчыма, гэта служба АГІМ (Аддзел грамадзянства і міграцыі) правярала, пашпартны аддзел. А хто менавіта прыходзіў, яны не прадставіліся?
— Дакладна не ведаю, з міліцыі... Але калі нават і пашпартны аддзел, што яны маглі правяраць? Нібыта нейкія дакументы арэнды правяралі…

— Мабыць, адсочваюць людзей, якія прыбываюць да нас, замежнікаў. Неяк звязана з гэтым.

У салігорскую службу АГІМ мы датэлефанавацца не змаглі, затое атрымліваецца дастукацца да яе ў Ваўкавыску.

— Так, прыходзілі. Гэта праверка.
— Якая?
— Жылля, якое здаецца ў наём. Хто там жыве. 
— Гэта ўсюды так правяраюць ці толькі майго бацьку?
— Так, усюды. Усе кватэры, якія здаюцца ў наём. Перажываць не варта. Правяралі, можа, там прыезджыя нейкія з-за мяжы ці яшчэ нешта такое. Вам няма пра што перажываць.

Міліцыянты з Рэчыцы і Клецка таксама пацвярджаюць, што ў гарадах ладзяцца такія мерапрыемствы.