Маці Ліхавіда: Маё дзіця вінаватае ў тым, што не мае расійскага пашпарта

На працэсе супраць юнака сведчылі ажно 29 спецназаўцаў, якія нібыта пацярпелі падчас разгону акцыі пратэсту ў паслявыбарчы вечар. Адно іх апытанне заняло 2 дні працэсу. Спецназаўцы блыталіся ў паказаннях, не пазнавалі абвінавачанага — але суд гэта не збянтэжыла. Прысуд 20-гадоваму сябру руху “За свабоду” вынесла суддзя Партызанскага раёну Наталля Пыкіна.

“Я з першага дня назірала, як суддзя абрала бок абвінавачання, а сёння нават не прыслухалася да словаў, якія казала адвакатка. У мяне было ўражанне, што ў іх усё ўжо загадзя прапісана”, — кажа маці Мікіты Алена Ліхавід. Жанчына рыхтавала сябе да горшага, але выйшла яшчэ горш, чым яна меркавала.

Алена Ліхавід: “Я чакала і была гатовая да трох гадоў зняволення. Але 3,5 узмоцненага рэжыму… Маё дзіця ў дадзенай сітуацыі вінаватае толькі ў тым, што не мае расійскага пашпарту”.

Маці Мікіты Ліхавіда, відавочна, мела на ўвазе лагодныя, у параўнанні з іншымі, прысуды грамадзянам Расіі Арцёму Брэўсу ды Івану Гапонаву: яны атрымалі ўмоўныя тэрміны і былі вызваленыя з-пад варты проста ў зале суда. Праваабаронца Валянцін Стэфановіч лічыць, што тым самым нашая судовая сістэма выразна паказала сваю залежнасць.

Валянцін Стэфановіч: “Калі быў візіт Пуціна і трэба было выпусціць расійскіх грамадзянаў — яны гэта зрабілі. Падобны прысуд атрымаў і Дзмітры Мядзведзь, справу якога слухалі ў той жа дзень. Зараз ніякіх прыездаў Пуціна не чакаецца, расійскія грамадзяне “скончыліся”, засталіся толькі нашыя, і таму прысуды будуць выносіцца такога кшталту, як сёння. Пазіцыя праваабаронцаў заключаецца ў тым, што мы настойвалі і настойваем на тым, што “масавых беспарадкаў” 19 снежня 2010 года ў Мінску не было. І сённяшні працэс Мікіты Ліхавіда яшчэ раз прадэманстраваў, што доказаў гэтага следствам прадстаўлена не было. Не была даказаная і віна ў гэтым самога Ліхавіда”.

Асноўным доказам віны Мікіты Ліхавіда стаўся кароткі відэазапіс, на якім хлопец наносіць удары па драўляных шчытох за разбітымі вокнамі Дому ўраду.