На Гомельшчыне затрымалі аршанцаў — выкрадальнікаў грузаў з фур
Фуры, ілюстрацыйнае фота
У Гомельскай вобласці пры падтрымцы АМАП міліцыянты затрымалі з доказамі злачынства групу людзей, якіх падазраюць у крадзяжах з фур на стаянках уздоўж трасы Брэст-Гомель, паведамляе прэс-служба МУС.
Затрыманыя — пяцёра жыхароў Оршы ва ўзросце ад 34 да 51 года. Дзейнічалі яны ў Брэсцкай, Магілёўскай, Мінскай і Гомельскай абласцях. Мужчыны выязджалі на "промысел" па начах, карысталіся балаклавамі і радыёстанцыямі. Пакуль кіроўца спаў у кабіне фуры, зламыснікі ўзломвалі замок грузавога адсека і нагружалі свой мікрааўтобус таварам. Потым яны пакідалі месца злачынства.
Ахвярамі іх дзейнасці станавіліся пераважна фуры з беларускімі нумарамі. Зламыснікі бралі ўсё — ад тэхнікі да прадуктаў. Да таго ж, яны злівалі паліва з бакаў. Крадзеныя тавары збывалі на тэрыторыі Расіі альбо дзялілі паміж сабой.
На аршанцаў пачалі крымінальную справу за крадзяжы ў буйным памеры. На сёння вядома пра шэсць эпізодаў іх злачыннай дзейнасці.
