“Набыць зямлю пад Новую Беларусь”. Беларусы спрабуюць дапамагчы сабе самі

Беларусы Польшчы прапануюць заданаціць усім разам палку Кастуся Каліноўскага, падтрымаць сем’і загінулых ваяроў, арганізаваць сэрвіс продажу квіткоў на платформе “Новая Беларусь”, прыдумаць беларускую гульню з гістарычным / адукацыйным ухілам, распрацаваць платформу кааператыўных гульняў, стварыць агульны дапаможнік для беларусаў у эміграцыі, пра які ўжо пісалася вышэй, — англамоўны гістарычны партал і кавалачак зямлі.

Беларусы Літвы лічаць, што было б добра стварыць лічбавую беларускую школу, а таксама адкрыць бібліятэку з беларускай літаратурай за мяжой.

“Насамрэч прапанаваных ідэй было значна больш — агулам 24, — расказваюць у “Новай Беларусі”. — Усе яны былі цікавыя ці як мінімум вясёлыя. Напрыклад, хтосьці з удзельнікаў прапанаваў аддаць беларусам Калінінградскую вобласць, калі здарыцца падзел РФ. На жаль, некаторыя з прапаноў выбылі пасля мадэрацыі, бо не адпавядалі заканадаўству Польшчы і Літвы ці статуту нашых партнёрскіх устаноў, куды пералічваліся працэнты ад падаткаў. А некаторыя не прайшлі адбор, таму што не набралі неабходны мінімум падабаек ад удзельнікаў і ўдзельніц праекта”.