Падчас прамовы Лукашэнкі ў Кіеве страціў прытомнасць украінскі генерал

21 ліпеня ў Кіеве сустрэліся Аляксандр Лукашэнка і Пётр Парашэнка. Пасля перамоваў прэзідэнты выйшлі да журналістаў з невялікімі прамовамі.

Спачатку выступіў Пётр Парашэнка — ён казаў пра сяброўскія адносіны паміж Беларуссю і Украінай і патэнцыял ва ўзаемным гандлі. Прэзідэнт Украіны адзначыў, што таваразварот паміж краінамі павялічыўся на 26%, Беларусь з'яўляецца для Украіны чацвертым па важнасці гандлёвым партнёрам, а Украіна для Беларусі — другім.

Пасля слова ўзяў Аляксандр Лукашэнка. Усё ішло добра, але на другой хвіліне прамовы кіраўнік Беларусі неспадзявана перапыніўся і папрасіў "даць чалавеку стул".

У гэты момант у зале нехта ўпаў на падлогу. Як высветліла Еўрарадыё, гэта быў кіраўнік Памежнай службы Украіны Віктар Назаранка. Пётр Парашэнка выйшаў з-за трыбуны, каб дапамагчы яму падняцца, але чыноўніка ўжо выносілі з залы на руках.

Інцыдэнт заняў блізу паўхвіліны.

"Вось вам і насычаныя перамовы. Не трэба занадта абцяжарваць нашых членаў ураду", — адкаментаваў Лукашэнка і працягнуў прамову.

Генерал-палкоўніку Віктару Назаранку 61 год. Ён нарадзіўся ў Мінску 5 сакавіка 1956 года, скончыў Львоўскую вышэйшую ваенна-палітычную вучэльню. Удзельнік вайны у Афганістане. Кіраваць Памежнай службай Украіны прызначаны 23 кастрычніка 2014 года.