Пасля ДТЗ мінчук спрабаваў схавацца на апоры ЛЭП (фота)

Як паведамляе сайт auto.onliner.by са спасылкай на ДАІ, кіроўца на грузавым ГАЗе ехаў па вуліцы Алібегава. Па датычнай траекторыі ён зачапіў прыпаркаваны Ford Sierra. Адразу пасля аварыі ён з'ехаў. А крыху пазней той жа грузавік сутыкнуўся з BMW 5-Series на вуліцы Гарэцкага.

Інспектары выехалі на месца здарэння і знайшлі ГАЗ. Аднак кіроўцы ў кабіне не было, толькі нейкі мужчына ўцякаў у поле. Даішнікі вырашылі, што гэта магчымы вінаваўца аварый, і пабеглі за ім.

Заўважыўшы пагоню, мужчына забраўся на апору ЛЭП і крычаў, што скончыць жыццё самагубствам. Да месца здарэння прыбылі машыны выратавальнікаў, міліцыі, "хуткай". Пазней з'явілася і жонка кіроўцы — як выявілася, яны некалькі гадзін таму пасварыліся. На ўгаворы мужчына не паддаваўся, заставаўся на апоры лініі электраперадач. Потым ён распрануўся, злез і нават здолеў уцячы ад міліцыянтаў.

Затрымалі парушальніка ў прыватным сектары. Як выявілася, ДТЗ здзейсніў 32-гадовы мінчук. На яго склалі 5 пратаколаў па лініі ДАІ. Не выключана, што яго чакае адказнасць і за тое, што адбывалася пасля аварыі.

Фота — onliner.by