"Позні Брэжнеў": як беларусы адрэагавалі на з'яўленне "васковага" Лукашэнкі

Лукашэнка з'явіўся ў публічнай прасторы ўпершыню з 9 траўня — увечары 15 траўня фатаграфіі, а пазней нават кароткае відэа з ім апублікавала яго прэс-служба і дзяржаўныя медыі. Праўда, "трыумфальнага вяртання" палітыка не адбылося: дзіўны знешні выгляд Лукашэнкі і яго асіплы голас толькі падмацавалі меркаванне многіх пра тое, што ён хворы, а таксама выклікалі цэлую хвалю жартаў.

"Украінцы, канешне, тыя яшчэ... Мёртвага падымуць і заставяць "працаваць у цэнтральным камандным пункце ВПС і войскаў СПА", — піша твітарскі @tavarysh_b.

Карыстальнік твітара пад нікам @hasid_ напісаў: "Лукашэнка з'явіўся на публіцы ўпершыню з 9 траўня" — і дадаў фатаграфію са здымак фільма "Чалавек — швейцарскі нож", дзе Дэніэл Рэдкліф грае нябожчыка.

Не жартамі, але цікавым назіраннем падзяліўся гісторык Аляксандр Фрыдман: "Людзі, якія заспелі позняга Брэжнева і назіралі за Лукашэнкам, адчуваюць сёння дэжавю".

Паралель з савецкімі правадырамі правёў не толькі ён. "Нікчэмная пародыя і непаўторны арыгінал", — напісаў карыстальнік @drennydread, прымацаваўшы свежую фатаграфію Лукашэнкі і апошні здымак ужо цяжка хворага Уладзіміра Леніна.