П'яны гомельскі пенсіянер закідаў аптэку цаглінамі дзеля настойкі глогу
Пад крымінальную справу трапіў гомельскі пенсіянер, якому ўначы захацелася выпіць.
Як паведамляе прэс-служба УУС Гомельскага аблвыканкаму, здарэнне адбылося ў ноч на 30 жніўня. Пасля паўночы відавочна нецвярозы грамадзянін прыйшоў у кругласутачную аптэку па праспекце Рэчыцкім і папрасіў тры флаконы настойкі глогу. Правізар патлумачыў яму, што спіртазмяшчальныя настойкі прадаюцца толькі ўдзень і па адным флаконе за раз. Мужчына праявіў агрэсію, і правізар прадаў яму адзін флакон, каб пазбегнуць непрыемных наступстваў.
Аднак праз нейкі час настойлівы пенсіянер вярнуўся і запатрабаваў дабаўкі. Пачуўшы адмову, гамяльчук ненадоўга адышоў і вярнуўся з цаглінамі. Ён кінуў дзве цагліны — у акенца касіра і шклопакет дзвярэй. Пасля гэтага правізар націснуў трывожную кнопку. Сам ён падчас інцыдэнту не пацярпеў.
Экіпаж аховы затрымаў мужчыну, які нават не спрабаваў уцячы і ва ўсім прызнаўся. Дарэчы, яго ўчынак зафіксавала і камера відэаназірання. На гамельчука пачалі крымінальную справу за хуліганства.
па словах старшага аперупаўнаважанага Савецкага РАУС маёра міліцыі Максіма Бялова, 52-гадовы пенсіянер раней у поле зроку праваахоўнікаў не трапляў. У той дзень мужчына вярнуўся з лецішча і вырашыў адпачыць, аднак наяўнай выпіўкі яму не хапіла. У пошуках дабаўкі ён і пайшоў у бліжэйшую кругласутачную аптэку.
