Швед атрымаў ад Лукашэнкі заданне вывучыць справы асуджаных "экстрэмістаў"

Андрэй Швед атрымаў ад Аляксандра Лукашэнкі задачу вывучыць справы асуджаных "экстрэмістаў" ("за злачынствы экстрэмісцкай накіраванасці"). Займацца гэтым будзе "камісія па вяртанні" ("разам з папраўчымі органамі"), якую ачольвае генпракурор. Пра гэта Лукашэнка расказаў у Казані ў інтэрв'ю карэспандэнту "Бі-Бі-Сі" Стыву Розэнбергу. Паводле яго слоў, такую задачу ён паставіў некалькі дзён таму.

"Я схільны да таго, каб людзі, якія ўсвядомілі, зразумелі і не парушаюць парадак там і паводзяць сябе годным чынам (не трэба спяваць оду мне), разгледзець гэтыя пытанні [аб памілаванні]... Можа, хтосьці заслугоўвае гэтага", — сказаў Аляксандр Лукашэнка. Ён не стаў тлумачыць, чаму менавіта цяпер зацікавіўся "экстрэмістамі". А па "экстрэмісцкіх" артыкулах асуджаны тысячы беларусаў (толькі ў Мінску такіх спраў тысячы).

Згаданая камісія Шведа павінна была займацца вяртаннем у РБ палітуцекачоў. Але зваротаў было так мала, што камісія пачала займацца нават справамі футбалістаў, якім за выказванне грамадзянскай пазіцыі ў 2020-м не дазвалялі на радзіме гуляць у футбол на прафесійным узроўні.