Трамп забраў у Харыс і Клінтан доступ да сакрэтнай інфармацыі

Прэзідэнт ЗША Дональд Трамп адклікаў допускі да сакрэтнай інфармацыі ў сваіх супернікаў па выбарчых гонках, прадстаўнікоў дэмакратычнай партыі Камалы Харыс і Хілары Клінтан. Доступу пазбавіліся таксама шэраг былых высокапастаўленых чыноўнікаў, піша ВВС.

У лютым Трамп заявіў, што адклікае доступ да сакрэтнай інфармацыі свайго папярэдніка Джо Байдэна, а таксама ў "любога іншага члена" сям'і Байдэна.

"Я прыйшоў да высновы, што прадастаўленне наступным асобам доступу да сакрэтнай інфармацыі больш не адпавядае нацыянальным інтарэсам", – гаворыцца ў заяве Трампа.

Былыя прэзідэнты ЗША і вышэйшыя службовыя асобы службаў бяспекі звычайна захоўваюць свой допуск да сакрэтнай інфармацыі. Гэта лічыцца праявай ветлівасці.

Доступу таксама пазбавіліся экс-дзяржсакратар Энтані Блінкен і некаторыя палітыкі ад рэспубліканскай партыі, да якой належыць сам Трамп. Сярод іх, напрыклад, Ліз Чэйні, якая вядома крытыкай дзейнага прэзідэнта.

Джо Байден таксама тое-сёе забараняў Трампу. У 2021 годзе ён забараніў яму доступ да брыфінгаў разведкі, спаслаўшыся на "нестабільныя паводзіны" свайго пераможанага апанента.