У Германіі "Мерсэдэс" урэзаўся ў трактар "Беларус"

Аварыя з удзелам трактара "Беларус" і легкавога аўтамабіля "Мерсэдэс" здарылася ў нямецкім горадзе Хельдрунген у федэральнай зямлі Цюрынгія. Як піша сайт "Беларусь і свет" са спасылкай на мясцовую паліцыю, ДТЗ адбылося ўвечары 10 лютага.

54-гадовы кіроўца "Мерсэдэса" праз няўважлівасць няправільна ацаніў хуткасць трактара, які ехаў перад ім у тым жа кірунку. У выніку аўтамабіль на высокай хуткасці ўрэзаўся ў трактар.

Агульную шкоду, прычыненую легкавіку і трактару, ацанілі прыкладна на 18 тысяч еўра. Абодва кіроўцы (к тым ліку 37-гадовы мужчына, які кіраваў трактарам) атрымалі няцяжкія траўмы. Ім аказалі медыцынскую дапамогу.