Вынікі конкурса перакладаў The Beatles падведзеныя

30/05/2013 - 12:29

Падведзеныя вынікі конкурсу перакладаў песень The Beatles, прымеркаванага да фэсту The Beatles Shabli. Еўрарадыё атрымала з тузін тэкстаў, якія вельмі нас пацешылі. Нехта спрабаваў “узяць” дармавыя квіткі ўменнем, а нехта — ідэяй. Як, напрыклад, аўтар перакладу “Why Don't We Do It In The Road”, які, як і арыгінал песні, складаецца з двух радкоў:

“Давай кахацца на шляху.

Ніхто не будзе назіраць”.

Але ўсё ж пераможцам конкурсу стаў Лявон Казакоў. Яго пераклад “A Hard Day’s Night” сапраўды літаратурны! І галоўнае: яго зручна спяваць у караоке!

Журы конкурса, у склад якога ўваходзілі журналісты Еўрарадыё і арганізатары фэсту, таксама адзначыла працы Даркі Кабаковай (“Сустрэць Усход” — “Here Comes The Sun”), Ані Бучко (“Закаханы” — “And I Love Her”), Аляксея Мялешкі (“Дарагая” — “Oh! Darling”), Каці Пціцынай (“Хэй, Джуд”) і Сяргея Януша (“У маім жыцці” — “In my life”) — іх усе, а таксама і колькі іншых перакладаў можна будзе праспяваць падчас The Beatles-караоке ад Еўрарадыё на фестывалі The Beatles Shabli.

The Beatles — “Гэта быў цяжкі дзень” (A hard day’s night)

Альбом: A hard day’s night

Джон Ленан, Пол Макартні

Пераклад-пераможца конкурса Еўрарадыё: Лявон Казакоў

Гэта быў цяжкі дзень, стаміўся я нібыта воўк

Гэта быў цяжкі дзень, мне б адыйсці ў краіну сноў

І я прыйшоў да цябе, каб не згубіцца ў журбе

І вось таму так файна мне.

Я працаваў увесь дзень, каб аб галечы нам забыць.

А ў сусветнай мітусні твая ўсмешка кліча жыць.

Навошта ганьбіць наш лёс, калі мы крочым наўпрост,

І ў гэтым свеце шчасце ёсць.