Выйшаў на волю былы галоўны ідэолаг БЕЛТА — палітвязень Сяргей Адзярыха

Стала вядома пра вызваленне былога высокапастаўленага менеджара БЕЛТА Сяргея Адзярыхі, асуджанага за "палітыку". Пра гэта даведалася "Наша Ніва".

Адзярыха быў намеснікам гендырэктара БЕЛТА па ідэалогіі. Яго арыштавалі ў кастрычніку 2021 года і прысудзілі пяць гадоў калоніі, прызнаўшы вінаватым у "перавышэнні ўлады". Абвінавацілі яго ў перадачы інсайдарскай інфармацыі Анатолю Котаву ў Народнае антыкрызіснае ўпраўленне — напрыклад, пра графік паездак Лукашэнкі ці іншых чыноўнікаў. Перададзеныя звесткі публікаваліся ў тг-канале "Нік і Майк", агулам было 58 допісаў. За сваю інфармацыю Адзярыха не атрымліваў грошы.

Праваабаронцы прызналі яго палітвязнем. Прысуджаны яму тэрмін павінен быў закончыцца прыкладна ў ліпені 2026 года. Аднак НН даведалася, што Адзярыха ўжо некалькі месяцаў на волі і працуе таксоўцам: адпаведнае ІП ён зарэгістраваў яшчэ ў кастрычніку 2025 года.

Артыкул, паводле якога асудзілі Адзярыху, быў "карупцыйным", а не "экстрэмісцкім". Таму ён тэарэтычна мог трапіць пад амністыю.